Tiranë – Me publikimin e listës së kombëtares nga ana e trajnerit Josip Kuzhe, Shqiperia nisi përgatitjet për ndeshjen kundër Bjellorusisë, e pesta në kalendarin e kualifikueseve të Euro 2012.
Shqipëria synon ta fitojë betejen në “Qemal Stafa”, jo vetëm që të arrijë me pikë Bjellorusinë (në rast fitoreje të dyja skuadrat barazohen me 8 pikë), por dhe të regjistrojë fitoren e parë në katër përballjet me ish-republiken sovjetike, me të cilën ka regjistruar në 3 ndeshjet e luajtura deri tani, 2 humbje dhe 1 barazim.
Në ndeshjen e 12 tetorit të vitit të kaluar, Vitali Rodionov dhe zëvendësuesi Sergei Krivets ndëshkuan 2-0 Shqipërinë, në një nga ndeshjet më të dobëta të saj, por të shoqëruar edhe me mungesën e trajnerit Josip Kuzhe në bankinë. Atëherë, trajneri kroat sapo kishte dalë nga Spitali Amerikan, ku u shtrua pas hemoragjisë cerebrale. 
Shqipëria dhe Bjellorusia kanë një histori të paktë përballjesh, por nëse në ndeshjen e parë të zhvilluar në Minsk, në 2 shtator 2006, për eliminatoret e Euro 2008, nën drejtimin e teknikut kroat, Oto Bariç, kombëtarja shqiptare barazoi 2-2 me golat e Ervin Skeles dhe Besnik Hasit, në ndeshjen e kthimit në “Qemal Stafa”, kombëtarja me ndihmësin Slavko Kovaçiç në bankinë (Bariç ishte i pezulluar) humbi 4-2 (17 nëntor 2006). Golat e Shqipërisë mbajnë firmat e Erjon Bogdanit dhe Edmond Kapllanit. 
Aktualisht, pas 4 ndeshjeve, Bjellorusia është ekipi i vetëm që nuk ka pësuar humbje në Grupin D (Shqipëria ka vetëm një humbje po me bjellorusët), por në “Qemal Stafa”, kombëtarja jonë nuk ka humbur asnjë takim. Grupi D kryesohet nga Franca me 9 pikë, Bjellorusia 8, Shqiperia 5, Bosnja 4, Rumania 2 dhe Luksemburgu 1. 
Shqipëria në katër ndeshjet e para kualifikuese ka grumbulluar pesë pike: fitoi me Luksemburgun (1-0, në Tiranë), barazoi me Rumaninë (1-1, në Pietra Neamnt) dhe Bosnjen (1-1, në Tiranë).
Tre golat e Shqipërisë mbajnë firmat e Gjergji Muzakës (kundër Rumanisë), Hamdi Salihit (kundër Luksemburgut) dhe Klodian Duros (kundër Bosnjes).
Për Shqipërinë, ndeshja kundër Bjellorusisë është e para zyrtare për vitin 2011, ndërkohë që po në këtë vit, në miqësoren e luajtur në “Qemal Stafa”, kombëtarja shqiptare humbi 2-1 me Slloveninë (gol i Ervin Bulkut).
Për trajnerin Josip Kuzhe kjo ndeshje është e teta zyrtare dhe e 17-ta në bankinën e Shqipërisë. Josip Kuzhe është trajneri i pestë në epokën e presidentit të FSHF-së, Armand Duka, pas italianit Xhuzepe Dosena, gjermanit Hans-Peter Brigel, kroatit Oto Bariç dhe holandezit Ari Han.