Spektatorët në garat e skermës dhe biçikletave BMX gjatë Olimpiadës, mund të gjenden përballë një surprize të vërtetë kur mes spektatore të shohin ish-rekordmenin botëror të vrapimit në 100 metra, Karl Luis.

Atleti amerikan, i pranishëm në Londër si opinionist për media të ndryshme, ka zbuluar se i ka vënë si qëllim vetes të shohë çdo sport olimpik të mundshëm të paktën në një garë.

Ai ka ndjekur nga afër të katër edicionet e Lojërave Olimpike që nga momenti kur doli në pension, ndërsa tani dëshiron që të jetë më i përfshirë.

“Ajo që dashuroj më shumë rreth Olimpiadave është numri i sporteve të ndryshme. Sa herë që vi në një Olimpiadë, mundohem të zgjedh një sport të ri dhe këtë vit kam zgjedhur BMX dhe skermën. Nuk kam zgjedhur sportet e pistës në atletikë pasi po shoh ato sporte të cilëve u kam qëndruar më larg si atlet”, tregoi Luis.

Sipas tij, Olimpiada e Londrës mund të jetë një nga më të bukurat edhe për faktin se kushtet atmosferike në kryeqytetin e Anglisë nuk janë nga më perfektet. Kjo mund të sjellë surpriza edhe në garën e tij të preferuar, finalen e 100 metrave, të parashikuar me 4 gusht.

“Shihni sa fresk bëhet gjatë darkës. Kjo ndryshon disi dinamikën e garave. Finalja e 100 metrave do të jetë interesante dhe do të ketë surpriza”, tha ai. (LajmeShqip.com)