Kampionia e re e Evropës, FC Barcelona, pas festimit të titullit ka filluar të mendojë seriozisht në përforcimin e skuadrës për sezonin e ri dhe t’i ripërsërisë sukseset e viteve të fundit.
Barça nuk e ka ndërmend të kursehet, duke pretenduar se kanë skuadër që prapë të fitojë gjithçka. Me disa largime që pritet të bëhen, si shitja e lojtarëve në huazim dhe disave në skuadër, Barça do të pushtojë tregun evropian të transferimeve.
Guardiola, Zubizarreta dhe komplet stafi tjetër i Barçës do të vihen në ofensivë për të sjellë emrave të rinj e premtues.
Sipas SPORT, Barça ka në mendje 3 emra të mëdhenj: Cesc Fabregas, Alexis Sanchez dhe Giuseppe Rossi. Alternativë mbeten edhe Javier Pastore dhe Willian Borges, ndërsa “EMD” thotë se Javier Pastore është favorit nga stafi i Barçës.
Fabregas është emri që kërkohet gjatë nga Barça dhe duket se në këtë vit mund të realizohet transferimi i tij. Por, Barça do të tentojë ta blejë atë me një shumë minimale, me rreth 25-30 milionë euro, ndoshta edhe përfshirjen e ndonjërit prej lojtarëve të saj.

Vetë Cesc është i entuziazmuar të rikthehet në vendlindje dhe verën e kaluar, kur ishte shumë pranë kalimit, u bllokua transferimi i tij, duke i ‘premtuar’ se do të fitojnë trofe dhe do të largohej vitin tjetër. Cesc dhe vetëm Cesc,  kjo është kërkesa e Pep Guardiolës.

Giuseppe Rossi, italiani 24-vjeçar, lojtar i Villarrealit, është opcioni i parë i Barçës për sulm. Rossi ka pasur një sezon të shkëlqyer me Villarreal, duke realizuar 32 gola në këtë sezonë, në të gjitha garat. Skuadra nga El Madrigal kërkon 35 milionë euro për të, por Barça nuk ofron më shumë se 30 milionë euro dhe këtë shumë do të mundohet ta reduktojë me ofrimin e Botias, të cilin Barça mund ta riblejë për 1 milionë euro, në vend të rreth 25 milionë eurosh.
Alexis Sanchez, kileani 22-vjeçar, lojtar i Udineses, ka qenë sensacioni i këtij edicioni në Serie A. Me 12 gola dhe 11 asiste në këtë edicion, teknikë dhe shpejtësi, Alexis konsiderohet ideal për Barçën. Është zgjedhur si lojtari më i mirë i sezonit në Itali. Zyrtarët e Barçës kanë negociuar me agjentin e lojtarit dhe janë pajtuar për të gjitha pikat e marrëveshjes para pak kohësh, mirëpo nuk ka pasur ofertë konkrete në drejtim të skuadrës së Udineses.
Problemi tek Sanchez qëndron në faktin se lojtari ka oferta të mëdha nga Chelsea e Man City të cilat kanë ofruar nga 35 milionë euro, ndërsa Inter ka raporte të shkëlqyera me skuadrën e Udineses, dhe po ashtu ka ofruar shumë të madhe parash dhe disa lojtarë.
Barça duhet të ngutet shumë nëse e dëshiron blerjen e tij, sepse ofertat në drejtim të tij nuk kanë të ndalur. Por, vetë lojtari është tejet i entuziazmuar të luaj ëtek skuadra që po cilësohet “më e mira në histori” dhe përkrah lojtarit më të mirë në histori, Messi.
Javier Pastore, Argjentinasi 22-vjeçar, lojtar i Palermos, nga shumë ekspertë është cilësuar si “Kaka i Argjentinës”. Një lojtar i gjatë, me teknikë të dalluar, golashënues i mirë, me 12 gola e shumë asiste, një shok i Messit, është njëri prej emrave më të kërkuarve në tregun e futbollit dhe prej emrave që kanë potencial të madh dhe premtojnë shumë në të ardhmen.
Vetë Presidenti i Palermos ka deklaruar se “Pastore do të shkojë tek Barça”, duke theksuar se lojtari e ka ëndërr bashkimin me Messi.
Vetë Messi ka kërkuar nga drejtuesit e Barçës që Pastore të jetë blerja e ardhshme e klubit.
Willian Borges. Një opsion tjetër është edhe braziliani 22-vjeçar i Shakhtar Donetsk. Vetë lojtari ndjehet i privilegjuar me vëzhgimin e Baçës për të. Por, skuadra ukrainase kërkon rreth 25 milionë euro për të.
Një opcion i viteve të kaluara mund të rikthehet në agjendën e Barçës. Fjala është për Sergio Agueron, sulmuesin 22-vjeçar të Atletico Madridit dhe kombëtares së Argjentinës.
Por, çmimi i lartë prej 45 milionë eurosh që kërkon Atletico, është i papranueshëm për Barçën. Por, mund të ulet kjo shifër, pasi vetë lojtari do ta ëndërronte një kalim tek Barça dhe mundësinë që të përfshihen edhe lojtarë në këtë marrëveshje.
Në rast se Barça arrin marrëveshje me Cesc dhe 2 prej sulmuesve të lartpërmendur, sidomos Alexis/Pastore dhe Rossi, atëherë mund të priten largime në sulmin e Barçës.

Pas një sezoni fantastik të përmbyllur me fitimin e Ligës së Spanjës dhe Ligës së Kampionëve, stafi i Barçës është duke menduar rreth planeve për skuadrën e sezonit 2011/12. Barça ka në dispozicion rreth 50 milionë euro për transfere, që edhe mund të rriten, pas sukseseve, por edhe dëshiron shitjen e lojtarëve të panevojshëm, për të bërë blerje tjera.
I pari që përmendet për largim është mbrojtësi argjentinas Gabriel Milito (30), i cili kishte shumë pak hapësira dhe ishte afër largimit në dimër. Për të kanë shprehur dëshirë shumë skuadra evropiane. Kontrata i skadon në vitin 2012 dhe vështirë është të mendohet se do të vazhdojë edhe në sezonin e ardhshëm në skuadër. Çmimi në treg sillet rreth 6-7 milionë euro.
Lojtari tjetër që pritet të largohet është edhe Jeffren Suarez (23). Liverpool ka shprehur gatishmëri për talentin e Barçës dhe është gati të ofrojë 10 milionë euro për të. Po ashtu, edhe skuadra të tjera e dëshirojnë Jeffrenin.
Bojan Krkiq (20) është njëri prej emrave të mundshëm për largim, pasi ka dështuar të dëshmojë veten që disa vite.

Performancat e Messit, Villas e Pedros, si dhe ardhja eventuale e Rossit, do ta bënin shumë të vështirë hapësirën për Bojanin dhe ai mund të largohet. Shumë skuadra kanë shprehur interesim për të dhe ofertat nuk janë të vogla. Sillen nga 15 deri në 20 milionë euro.
Opcionet e mundshme janë edhe huazimi, por më e mundshmja është shitja me mundësi riblerjeje.
Maxwell (29) është emri tjetër që me shumë mundësi do të largohet, pasi edhe vetë agjenti i lojtarit ka biseduar me drejtuesit e skuadrës për largim. Milan është destinacioni i mundshëm, ku do të ribashkohej sërish me Ibrahimoviqin, pas Ajaxit, Interit, Barcelonës dhe tash Milanit. Gjatë dimrit Maxwell kishte një ofertë të majme nga Zeniti, por u refuzua nga Barça, ndërsa tani çmimi varion në rreth 6-7 milionë euro.
Alexander Hleb (30) pritet të largohet përfundimisht pas huazimeve të njëpasnjëshme, që së fundi ishte tek Birmingham City. Edhe për të çmimi varion rreth 5 milionë euro.
Henrique (24), që u ble në vitin 2008 dhe nuk pati mundësinë asnjëherë të luajë për Barçën, aktualisht i huazuar tek Racing Santander, do të shitet përfundimisht. Palmeiras është i interesuar për të. Çmimi për të sillet rreth 4-5 milionë euro. Mund të përdoret edhe për ndonjërën blerje të Barçës.
Keirrison (22) njëjtë sikurse Henrique, nuk e kishte fatin të luaj me Barçën, përfshirë miqësore. Ende nuk është e qartë se si do të veprohet me të: të vazhdohet huazimi apo shitja përfundimtare, mundet që të përfshihet në njërin nga transferet e Barçës.

Victor Sanchez (23) i huazuar te Getafe, është njëri prej emrave që pritet të shitet përfundimisht ose të përdoret opsion blerje.
Alberto Botia (22) është lojtar që është tek Sporting Gijon, dhe mund të rikthehet në skuadër. Barça do t’i shqyrtoj ofertat për të, e sidomos mund të jetë pjesë e marrëveshjes për Rossin.
Sipas të gjitha gjasave, Barça nuk do të bëjë blerje në qendër të mbrojtjes, pasi Guardiola është i kënaqur me lojtarët aktual Puyol dhe Pique, e po ashtu Abidal, e Mascherano që është përshtatur jashtëzakonisht mirë në mbrojtje, sikurse talenti Fontas. Edhe Busquets është opsion shtesë, së bashku me lojtarët nga Barça B, Muniesa e Bartra.
Shitja e këtyre lojtarëve mund t’i sjellë Barçës rreth 60 milionë euro të hyra, të cilat do të përdoren për blerjen e Fabregasit, Rossit etj.