Zlatan Ibrahimoviç ka bërë të qartë se nuk do të bëjë më premtime për të qëndruar në një skuadër, pasi fillimi i sezonit të ardhshëm mund ta gjejë në radhët e ndonjë skuadre tjetër. Sulmuesi suedez, “i djegur” nga eksperienca e vitit të kaluar me Milanin, nuk ka ngurruar të deklarojë për mediat franceze se nuk ka siguri për të ardhmen e tij, edhe pse ka një kontratë për dy sezone të tjera me PSZH.

“A do të kthehesha në Itali? Juventus, Inter dhe Milan janë tre ndër klubet më të mëdha në botë. Unë kam fituar me ata dhe e di se çfarë do të thotë të jesh futbollist në Itali, vendi më fanatik në botë pas këtij sporti. Nuk di të them nëse do të qëndroj te PSZH, sepse sa herë që kam thënë se do të qëndroj për një kohë të gjatë, pastaj jam larguar. Kam planifikuar shpesh të qëndroja për një periudhë të gjatë në një klub, por një gjë e tillë nuk ka ndodhur kurrë”, ishin fjalët e Ibrahimoviç.

Por suedezi është shfaqur shuam i qartë në komentin rreth situatës së trajnerit Ançeloti, pasi në rast se do të vazhdojë të jetë pjesë e skuadrës franceze, dëshiron të ketë italianin në pankinën e klubit.

“Ne lojtarëve nuk na thotë shumë gjëra, është një çështje mes tij dhe klubit. Unë kam një raport të shkëlqyer me të dhe nuk dua që të largohet. Ai është një personazh pozitiv dhe ka bërë jashtëzakonisht mirë po të shohësh konfuzionin që ishte krijuar në fillimet e tij këtu. Kë do të dëshiroja në vendin e tij? Askënd, dua të vazhdoj të stërvitem nga Ançeloti”. (LajmeShqip.com)