Cesk Fabregas e ka cilësuar gjysmëfinalen mes Spanjës dhe Portugalisë si “El Clasico” i Euro 2012. Mesfushori mendon se stili i lojës së Portugalisë është identik me atë të Real Madrid, me kundërsulme të shpejta falë shpërthimeve të jashtëzakonshme të Kristiano Ronaldo e Nani.

Ndërsa panjollët përdorin stilin e pasimeve të Barcelonës, duke bazuar lojën te gjenitë katalanas si Pike, Ksavi, Iniesta, Buskets dhe Fabregas. Në formacion ka edhe emrat e madrilenëve si Kazijas, Arbeloa, Ramos dhe Ksabi Alonso, por të gjithë janë dakord që kjo Spanjë i përngjet më shumë ideve të Guardiolës sesa atyre të Murinjos.

“Portugalia është një prej skuadrave më të forta. Ata mbrojnë mirë dhe janë vdekjeprurës në kundërsulm. Ata janë të përafërt me Real Madrid dhe ne duhet të jemi në maksimumin tonë në këtë sfidë. Këtë ndeshje mund ta krahasosh me Real Madrid-Barcelona përsa i përket stilit të lojës të dy ekipeve. Por mos harroni që jemi lojtarë të ndryshëm në kombëtare dhe ka shumë futbollistë nga ekipe të tjera”, tha Fabregas.

Fabregas ka pranuar se mentaliteti i ekipit ka ndryshuar dhe kujton se si katër vite më parë, pasi eliminuan Italinë me penallti në çerekfinale, të gjithë u çmendën nga gëzimi, në ndryshim me atë që ndodhi pas ndeshjes me Francën.

“Në fund të ndeshjes mendova “në rregull, fituam”. Katër vite më parë, kur fituam në çerekfinale, ne ishim të gjithë bashkë duke festuar si të çmendur në mesin e fushës. Përshëndetnim tifozët dhe familjarët, ndjenim kënaqësinë e suksesit tonë brutal kur mundëm Italinë. Ndërsa tani na duket si një detyrim, si diçka normale”, u shpreh ai. (LajmeShqip.com)

Grupi C

Spanjë-Itali                   1-1

63’ Fabregas / 61’ Di Natale

Spanjë-Irlandë             4-0

4’, 70’ Torres, 49’ Silva,  83’ Fabregas

Kroaci-Spanjë              0-1

88’ Navas

Çerekfinalet

Spanjë-Francë              2-0

19’, 90’+1’ (p) Ksabi Alonso

Gjysmëfinalet

27.06.2012

Portugali-Spanjë         20:45