Mark Ueber me Red Bull shkurtoi në 13 pikë diferencën me Fernando Alonson në kreun e renditjes së botërorit të Formula 1, pasi ndoqi e më pas kaloi Ferrarin në një garë dramatike në Silverston ku nuk pati shi.

Sebastian Vetel me makinën tjetër Red Bull u ngjit në shkallën e tretë të podiumit dhe nëse do të ishte “zgjuar” më përpara, mund të kishte patur mundësinë për të kaluar edhe ai Alonson, i cili shfaqi si gjithmonë probleme me gomat në xhirot e fundit.

Piloti spanjoll vendosi një distancë prej 5 sekondash diferencë me Ueber që e ndiqte që në fillimin e garës dhe arriti të ruante këtë diferencë thuajse gjatë gjithë garës. Por në kundërshtim nga pilotët e tjerë që përdorën fillimisht gomat e buta e më pas ata të fortat, spanjolli i Ferrarit ruajti setin e butë për në fund, duke bërë që të mos mbante më hapin e fillimit. Si rrjedhojë, Ueber iu afrua dhe pas një dueli që zgjati disa xhiro, arriti ta parakalonte duke i marrë fitoren kur kishin mbetur vetëm 4 xhiro nga fundi.

Vendi i katërt i takoi Felipe Masa, i cili u shfaq i ringjallur me Ferrarin dhe në gjendje për të luftuar me skuadrat e kreut. Pas tij u renditën dy makinat Lotus, me Raikonen që doli përsëri para shokut të skuadrës Groszhan.

Luis Hemilton dhe Xhenson Baton e përfunduan garën respektivisht në vendin e 8-të dhe 10-të me makinat MekLaren, të cilat u shfaqën shumë dobët në krahasim me rivalët për titull. Vendi i shtatë në garë i takoi Mikael Shumaker me Mercedes, ndërsa në vendin e 9-të u rendit Bruno Sena me Uilliams. (LajmeShqip.com)

Renditja e Botërorit të Formula 1

129      Fernando Alonso (Ferrari)

116      Mark Ueber (Red Bull-Reno)

100      Sebastian Vetel (Red Bull-Reno)

92        Luis Hamilton (MekLaren Mercedes)

83        Kimi Raikonen (Lotus-Reno)

75        Niko Rosberg (Mercedes)

61        Roman Groszhan (Lotus-Reno)

50        Xhenson Baton (MekLaren Mercedes)