Presidenti i FIFA-s, Sep Blater, ka aluduar se organizimi i Botërorit të vitit 2006 mund t’i  jetë dhënë Gjermanisë si pasojë e korrupsionit. 76 vjeçari tregoi se një nga anëtarët e Komitetit të Aktiviteteve ishte larguar nga salla gjatë votimit, ndërsa mendon se ishte shumë naiv që nuk i kishte shkuar mendja për një gjë të tillë në atë kohë.

“Botërorë që mund të jenë blerë… Po mendoj vetëm se si u caktua Botërori i vitit 2006, kur dikush krejt papritur u largua nga dhoma në sekondat e fundit. Në vend të një barazimi 10-10, votimi u kthye 10-9 në favor të Gjermanisë”, tha Blater gjatë një interviste për gazetën zvicerane “Blick”.

“Isha i lumtur që nuk kisha votën vendimtare. Por dikush thjesht u ngrit nga karrigia dhe braktisi dhomë ku po votohej. Nuk po aludoj asgjë, thjesht po tregoj atë çfarë ndodhi në të vërtetë”, ishte deklarata domethënëse e Blater.

Këto fjalë kanë sjellë një reagim shumë të ashpër nga Federata Gjermane e Futbollit, e cila është në pararojë të kërkesave për shkarkimin e Blater nga kreu i FIFA-s, pas zbulimit të skandaleve të presidentit të mëparshëm, Zhoao Havelanzh.

“Këto deklarata të mjegullta janë krejtësisht të pabazuara dhe duket se kanë vetëm për qëllim t’i shërbejnë objektivit të krijimit të një shpërqendrimi ndaj ngjarjeve që po ndodhin brenda FIFA-s”, tha Sekretari i Përgjithshëm i Federatës Gjermane, Helmut Sandrok. (LajmeShqip.com)