Vetëm dy ditë para se të luajë ndeshjen finale të kampionatit australian të futbollit, Besart Berisha është nderuar me një tjetër çmim prestigjioz. Ai është shpallur “Lojtari i Vitit” nga Shoqata e Mediave të Futbollit në Australi, falë kontributit që ka dhënë me 19 golat e tij për skuadrën e Brisbein Roar.

“Ky është një vlerësim për aftësitë e Besartit dhe përshtatjen e shpejtë që bëri në skuadrën e Brisbein”, tha presidenti i kësaj shoqate, Rei Gat. “Shumë prej nesh (media) menduam se Brisbein do të vuante këtë vit për shkak të largimit të disa prej pjesëtarëve të skuadrës që fitoi titullin në sezonin e kaluar, por Ange Postecoglu dhe lojtarët na provuan të kundërtën. Askush më tepër se Berisha, i cili jo vetëm që është një golashënues i provuar, por ka gjithashtu edhe tru futbolli. Ai ka aftësinë të shfrytëzojë hapësirën, e vendos veten shpesh në pozita ku mund të shënojë dhe kjo e bën atë një armë të rrezikshme sulmuese”, ishte vlerësimi për lojtarin shqiptar nga mediat e futbollit në Australi.

Ndërkohë, futbollisti po bëhet gati për sfidën më të madhe të karrierës, ndeshjen e të dielës kundër Perth ku mund të fitojë trofeun e tij të parë duke shpallur kampion ekipin e Brisbein.

“Po, shpresoj që ky të jetë titulli im i parë. Jam i uritur dhe pres me padurim të fitoj këtë trofe nëse më jepet mundësia. Një finale e madhe është diçka e veçantë, nuk e di kurrë nëse do të përsëritet dhe sa vite të duhen për t’u kthyer këtu. Dua të shfrytëzoj këtë rast dhe të marr titullin. A do më ngacmojnë kundërshtarët? Sigurisht, po edhe unë nuk kam problem t’u përgjigjem”, ishin fjalët e sulmuesit shqiptar i cili këtë sezon ka qenë protagonist absolut si me golat, ashtu edhe me sjelljen paksa të çuditshme në fushë. (LajmeShqip.com)