Garet Beil nuk po shkëlqen vetëm me veprimet e tij të shpejta në fushën e lojës, por edhe me goditjet standarde, gjë të cilën e ka vërtetuar më së miri në ndeshjen e Europa League të Totenhem kundër Olimpik Lion falë dy golave të shënuar me goditje dënimi. Uellsiani ka treguar se rregullsia me të cilën po shënon në goditjet e dënimit, vjen nga fakti se ai po stërvitet shumë në këtë aspekt të lojës së tij. 

“Jam shumë i lumtur. Jam praktikuar me goditjet e dënimit në fushën e stërvitjes dhe shënova një të tillë edhe në kampionat në javën e kaluar. Të dy këto gola erdhën në momentin e duhur në ndeshje”, tha ai pasi shënoi në minutën e fundit të pjesës së parë dhe në minutën e fundit shtesë të takimit për t’i dhënë suksesin 2-1 ekipit të tij.

“Lioni është një skuadër e mirë dhe të jemi të sinqertë, ne nuk ishim në 100% tonë, dukeshim pak të lodhur. Por gjëja më e rëndësishme është se ne arritëm të fitonim. Do të jetë e vështirë kur të luajmë në fushën kundërshtare, por ne po e marrim shumë seriozisht pjesëmarrjen në këtë turne”, tha futbollisti.

Goli i dytë i uellsianit në minutën fundit të shtesës u bë shkak për një zënkë që shpërtheu mes skuadrave, pasi ndihmësi i Vijas Boas, Stefan Froind, shkoi të festonte para stolit të Lionit, duke bërë që të niste një përplasje e cila u ndal me vështirësi pas vërshëllimës përfundimtare të gjyqtarit. (LajmeShqip.com)