Roberto Mançini ka cilësuar mungesën e përkushtimit në stërvitje si arsyen kryesore pse Mario Baloteli nuk ishte as në stolin e rezervave në takimin që Mançester Siti luajti ndaj Njukasëll.

Futbollisti i përfaqësues italiane nuk udhëtoi me skuadrën për takimin e luajtur në “St. Xhejms Park”, të mbyllur me fitoren 3-1 të kampionëve të Anglisë, ndërsa dyshen e sulmit titullare e formonin argjentinasit Aguero e Tevez, me Xheko që u aktivizua si zëvendësues.

I pyetur pse Baloteli nuk u përzgjodh për këtë sfidë, përgjigja e Mançinit ishte e prerë: “Ai ka nevojë të stërvitet më shumë!”.

Baloteli ishte titullar në sfidën e javës së kaluar ndaj Mançester Junajtid, por u zëvendësua në fillimin e pjesës së dytë pas një paraqitje aspak bindëse në humbjen 3-2. Mançini kritikoi ashpër lojtarin duke bërë të qartë se nuk po arrin të shprehë potencialin e tij dhe duke i kujtuar se Mançester Siti kërkonte më shumë nga ai. Por trajneri italian njëkohësisht ka hedhur poshtë zërat për një largim të mundshëm të futbollistit gjatë merkatos së janarit. (LajmeShqip.com)