Revista gjermane “Bild” ka publikuar lajmin bombë se Pep Guardiola ka filluar bisedimet me Bajern Mynih për t’u bërë trajneri i skuadrës bavareze në sezonin 2013-2014, pasi të përfundojë kontrata e trajnerit aktual Jup Heinkes.

Sipas “Bild”, drejtori sportiv i Bajern, Kristian Nerlinger, ka patur bisedime në maj me vëllain e Guardiolës, Pere, një prej këshilltarëve të teknikut spanjoll, gjatë finales së Kupës së Mbretit në Spanjë, të fituar nga katalanasit me rezultatin 3-0 përballë Atletik Bilbao. Sipas të njëjtit burim, trajneri katalanas ka konfirmuar interesimin e tij për të drejtuar bavarezët në të ardhmen.

41 vjeçari Guardiola arriti të fitonte 14 trofe në vetëm 4 sezone në drejtimin e ekipit katalanas dhe sipas “Bild”, përfundimi i kontratës së Heinkes në vitin 2013 është perfekt për të sjellë teknikun në Gjermani.

“Guardiola do të bëjë një vit pushim dhe do të ketë kohën e mjaftueshme për të mësuar gjermanisht dhe traditat gjermane”, shkruan “Bild”, që zakonisht ka lidhje shumë të ngushta me klubin bavarez dhe shpesh siguron lajme ekskluzive nga kjo skuadër. (LajmeShqip.com)