Menaxheri i përgjithshëm i Atletiko Madrid, Gil Marin, ka deklaruar se e ardhmja e Radamel Falkao është plotësisht në dorën e sulmuesit kolumbian dhe do të respektohet çdo lloj vendimi që ai do të marrë ai në merkaton e verës. Këtu përfshihet edhe lamtumira e tij e mundshme nga klubi.

Lojtari ka shënuar 28 gola në 33 ndeshje në këtë sezon, duke qenë protagonist absolut si në renditjen në vendin e tretë në kampionat për skuadrën e tij, ashtu edhe në fitoren e Kupës së Mbretit në Spanjë. Kjo ka zgjuar interesimin e klubeve angleze si Çelsi e Mançester Siti, ashtu si edhe atyre franceze si Monako e PSZH.

“Para fillimit të sezonit, ne biseduam me Falkaon. Ne i premtuam se në rast se do të kualifikoheshim në Ligën e Kampioneve, Atletiko do të mbështeste çdo vendim të tij për të ardhmen”, deklaroi Marin para gazetarëve në Singapor, ku Atletiko po merr pjesë në një aktivitet promocional. (LajmeShqip.com)