Arsen Venger ka instruktuar shefin e skautëve të tij në Francë, Zhil Grimandi, të përpilojë një dosje mbi sulmuesin e Montpelje, Olivier Zhirud. Trajneri i Arsenalit, bashkë me shefin e skautëve të tij, Stiv Rouli, kanë identifikuar sulmuesin francez si një nga objektivat me prioritet të merkatos së verës.

Sipas “Daily Mail”, Venger i ka kërkuar Grimandi të kontrollojë formën e Zhirud që tani deri në përfundimin e sezonit. Vetëm atëherë, ai duhet të dorëzojë një raport mbi formën e lojtarit 25 vjeçar.

Zhirud shihet si një prej talenteve më premtues në Francë, pasi 14 golave të vitit të kaluar i ka shtuar 22 të tjerë në këtë sezon. Kjo ka sjellë dhe aktivizimin e tij me kombëtaren franceze të futbollit, ku në 3 ndeshje ka shënuar një gol dhe shihet si një kandidat për të qenë pjesë e skuadrës në Euro 2012.

Për të janë interesuar dhe Njukasëll, Bajern Mynih dhe Juventus, por për asnjë prej këtyre skuadrave nuk do të jetë e lehtë për të realizuar transferimin e tij nga radhët e Montpelje. Pronari i ekipit francez, Luis Nikolin, ka thënë në një intervistë të dhënë dy javë më parë, se kushdo që kërkon sulmuesin duhet të bëjë gati një çek me vlerë 50 milion paund. (LajmeShqip.com)