Trajneri i Paris Sent Zhërmen, Karlo Ançeloti, ka hedhur poshtë të gjitha zërat që flasin për një interesim të klubit të tij rreth sulmuesit David Vija. Sipas disa gazetave spanjolle, PSZH po mendonte të bënte një ofertë prej 30 milionë eurosh për lojtarin, në mënyrë që të përmirësonte alternativat në sulm.

Ndonëse Ançeloti vlerësoi cilësitë e lojtarit, ai bëri të qartë se kjo ishte një hipotezë aspak reale.

“Ne nuk kemi menduar për David Vijan për arsyen e thjeshtë se ai ka qenë i dëmtuar për një kohë të gjatë. Ai është një sulmues i madh, por ne jemi në procesin e kërkimit të një lojtari që nuk ka probleme fizike. Për më tepër, nuk besoj se Barcelona do ta lërë të largohet”, tha trajneri italian.

Më pas, ai komentoi edhe deklaratat e Mamadu Sakho, i cili kishte bërë të qartë se mund të largohej nga ky klub nëse blihej një tjetër futbollist për qendrën e mbrojtjes.

“Ai duhet të kuptojë që PSZH do të bëhet një klub i madh dhe si në çdo klub të madh, do të ketë konkurrencë për një vend në formacion. Shpresoj që Mamadu ta pranojë konkurrencën ashtu siç ma konfirmoi kur pata një bisedë me të. Unë vendimet i marr me atë që shoh në fushën e lojës dhe jo me vlerën që është blerë futbollisti”, përfundoi Ançeloti. (LajmeShqip.com)