Masimiliano Alegri ka shpjeguar por të disatën herë se nuk është në diskutim dhe se do të vazhdojë të drejtojë Milanin, të paktën për sa percepton nga raporti i tij me presidentin Berluskoni.

“Gjatë këtyre muajve të fundit janë thënë shumë gjëra rreth raportit tim me Berluskonin, Galianin e skuadrën, duke krijuar situata që shpesh nuk janë përshkruar në mënyrën e duhur. Me presidentin flas shpesh, kam komunikuar me të edhe kohët e fundit. Që në momentin kur kam marrë drejtimin e Milanit nuk kam patur asnjëherë një debat me të. Ai e kupton momentin, i vjen keq, por më ka kërkuar që të qëndroj i qetë dhe të inkurajoj skuadrën”, tha trajneri i Milanit.

Megjithatë, Alegri është i ndërgjegjshëm që tani ka ardhur koha që Milani të bëjë ndryshime, por në fushën e lojës ku rezultatet kanë munguar në këtë fillim sezoni.

“Besimin nga ana e klubit e kam dëgjuar gjithmonë, kam qenë gjithmonë i qetë. Fjalët e Galianit më kanë bërë të ndjehem mirë, por tani ka ardhur koha të sigurojmë rezultate. Djemtë po rriten si skuadër dhe si lojë. Unë, nga ana ime, vetëm buzëqesh, pasi është që nga viti i parë që vihem në diskutim dhe jam mësuar me një gjë të tillë”, tha ai.

Në fund, trajneri i Milanit ka bërë të qartë se për momentin, skuadra nuk ka luksin të mendojë për objektiva në kampionat, ku gjendet në një pozicion të paparashikuar. “Në këtë moment, të flasim shumë ka pak vlerë. Për ne, objektivi numër një duhet të jetë të ngjitim klasifikimin pa menduar për vendin e parë, të dytë apo të pestë. Jemi në një pozicion që askush nuk priste në fillimin kampionatit. Por mos harroni që me 9 korrik kemi filluar sezonin me një ekip krejtësisht të ri”, ishte justifikimi i tij. (LajmeShqip.com)