Serxho Aguero nuk ka dyshime kush është sulmuesi më i mirë në botë aktualisht. Ai nuk ka ngurruar të tregojë preferencën e tij për Lionel Mesin, një mik i ngushtë personal, gjatë një bashkëbisedimi që është bërë në Twitter me tifozët anglezë nëpërmjet adresës së klubit.

“Cilët janë 3 sulmuesit më të mirë për momentin? Mesi, Mesi… dhe Mesi!”, ishte përgjigja e sinqertë e futbollistit argjentinas që ka treguar në këtë mënyrë të gjithë adhurimin për shokun e tij të skuadrës në kombëtare.

Më pas, ai është detyruar të tregojë edhe alternativat e tjera përveç yllit të Barcelonës, duke zgjedhur dy futbollistë që për arsye merkatoje, mund të bëhen kolegët e tij në repartin e avancuar.

“Nëse më duhet të zgjedh të tjerë them Van Persi dhe… Ronaldo”, ka treguar argjentinasi. Holandezi mund të bëhet shumë shpejt partneri i tij në sulm nëse vendos të transferohet te Mançester Siti nga radhët e Arsenalit, ashtu siç përflitet prej shumë kohësh.

Ndërsa me portugezin ai mund të formojë dyshen e sulmit te Real Madrid, i cili është interesuar për të që prej vitit të kaluar dhe sheh me interes çdo mundësi që do t’i jepet për të blerë Agueron në të ardhmen. (LajmeShqip.com)