Tiranë – Superliga do të rikthehet nesër me 4 takimet e para të javës së 26-të të saj, pas pushimit njëjavor si pasojë e ndeshjes së kombëtares, të fituar 1-0 ndaj Bjellorusisë, për eliminatoret e Euro 2012.

Takimi që spikat më tepër ditën e nesërme është derbi Dinamo – Tirana, i cili këtë vit duket se do të vendosë se cila prej këtyre dy ekipeve mund të synojë të arrijë një vend në Kupat e Evropës sezonin e ardhshëm, të paktën me anë të kampionatit, pasi ende të dyja skuadrat vijojnë rrugën e tyre në Kupë.

Derbi Dinamo-Tirana është i vetmi i kryeqytetit këtë sezon, nisur edhe nga fakti që Partizani ndodhet në Kategorinë e Parë.

Në dy ndeshjet e para të këtij sezoni: derbi i fazës së parë u mbyll në barazim 1-1 (në debutimin e Nevil Dedes si trajner i bardhebluve), ndërkohë që ai i fazës së dyte u mbyll me fitoren 2-1 të Tiranës, vetëm gjashtë dite përpara se Dede të jepte dorëheqjen nga bardhelutë pas barazimit 0-0 me Besën.

Në bankinën e Dinamos, në ndeshjen e parë ishte argjentinasi Luis Manuel Blanko, ndërsa në atë të fazës së dyte ishte Ilir Daja, që të dy të shkarkuar nga presidenti i bluve, Besnik Sulaj.

Në derbin e tretë sezonal do të kemi një duel të ri bankinash: Artan Mergjyshi i Dinamos me Misho Krstiçeviç të Tiranës.

Pas shtatë javësh kampionat, nga derbi i kaluar me Dinamon, (java 18), Tirana rigjeti fitoren: 1-0 ndaj Shkumbinit, në debutimin e trajnerit të ri të peqinasve, Kristaq Miles.

Autori i golit ishte Jahmir Hyka, goli i parë me fanellën e Tiranës në 8 javët e vitit 2011 i mesfushori të kombëtares shqiptare. Ky gol përkoi edhe me fitoren e parë në bankinë të trajnerit kroat të bardhbluve, Misho Krsticeviç (duke përjashtuar atë 5-1 kundër Bylis në çerekfinalet e Kupës së Shqipërisë).

Kategoria Superiore, java e 26-të

Të premten, 1 prill

Dinamo – Tirana          (16:00)

Laçi – Elbasani            (16:00)

Besa – Bylis                 (16:00)

Shkumbini – Vllaznia    (16:00)

Të shtunën, 2 prill

Teuta – Flamurtari        (16:00)

Kastrioti – Skënderbeu (16:00)

Renditja e Kategorisë Superiore

Nr.   Skuadra       N     F    B    H    Gsh-Gp    Pikë

1.    Flamurtari     25    18    1     6      49-17      55

2.    Skënderbeu  25    16    4     5      38-20      52

3.    Vllaznia         25    12    8     5      28-18      44

4.    Laçi              25    12    4     9     34-27      40

5.    Tirana           25      9   10    6      29-21      37

6.    Dinamo         25    10    6     9      37-32      36

7.    Kastrioti       25      7    9     9      26-33      30

8.    Shkumbini    25       8    5   12      33-42      29

9.    Teuta            25      7    7   11      22-28      28

10.  Bylis             25      8    3    14      33-43      27

11.  Besa             25      5    8    12      19-33      23

12.  Elbasani        25      4    3    18      23-57     12(-3)