Hamburg – Futbollisti i kombëtares shqiptare, Lorik Cana, duket se do të jetë në qendër të shumë klubeve gjatë merkatos verore. Që prej momentit që ekipi turk i Gallatasarajit deklaroi se Lorik Cana do të jetë në shitje gjatë merkatos së ardhshme, në drejtim të tij nuk kanë reshtur ofertat.
Por, duket se pas takimit të ditës së shtunë së Shqipërisë ndaj Bjellorusisë ato janë shtuar akoma më shumë dhe pritet të jenë akoma më tepër në hapjen e merkatos verore.
Tashmë në garë për Canën, pëveç gjermanëve të Shalkes, anglezëve të Boltonit dhe Aston Vilës dhe dy ekipeve elitare italiane si Lacio dhe Juventus, është shtuar edhe interesimi i klubit të Bundesligës gjermane, Hamburg.
Lajmi është konfirmuar pikërisht nga njëri prej menaxherëve kryesore të këtij klubi, Hartmut Schmidt, i cili është shprehur për gazeten gjermane “Der Spiegel” se, “pas këtij sezoni zhgënjyes të ekipit tonë ne do bëjmë të pamundurën për rindërtimin e skuadrës ku kemi në planet tona disa futbollistë shumë të mirë, por do të përqëndrohemi tek mesfusha ku na duhet patjetër një mesfushor shkatërrues dhe për këtë më duhet të cilësoj një emer interesant si ish-kapiteni i Marsejës dhe Sunderland, Lorik Cana. Ne po e ndjekim me vëmendje situatën që ai po kalon në klubin e tij Gallatasaraj, por e pamë atë (ashtu siç kemi bërë edhe më parë) me kombëtaren e tij”.
Shuma e transferimit për Canën gjatë kësaj merkatoje verore pritet të shkojë nga 8 deri në 10 milionë euro dhe kudo që të jetë ndalesa e lojtarit kuq e zi, shuma që klubet duhet të paguajnë tek turqit e Gallatasaraj për ta pasur atë, do të jetë rekordi shqiptar i transferimeve. Rekord që mbahet gjithnjë nga Cana, i cili gjatë merkatos së kaluar verore kaloi për shumën e 4.5 milionë eurove nga klubi anglez i Sandërlendit në drejtim të Gallatasarajit në Turqi.