Valdet Rama është aktivizuar 8 minuta në përballjen e “Elbasan Arena”-s me Danimarkën dhe 34 minuta në fitoren e ndeshjes miqësore me Francën 1-0. Shumë pak për një lojtar me tiparet e tij sulmuese dhe potencialin që ka ai.

Në fillim ishte një nga futbollistët e rëndësishëm të Gianni De Biasit, por me kalimin e kohës hapësira për të në Kombëtare u zvogëlua ndjeshëm. Madje, në këtë raund eliminatoresh, Valdet Rama është aktivizuar 8 minuta në përballjen e “Elbasan Arena”-s me Danimarkën dhe 34 minuta në fitoren e ndeshjes miqësore me Francën 1-0. Shumë pak për një lojtar me tiparet e tij sulmuese dhe potencialin që ka ai. Megjithatë, dëmtimet e shpeshta kanë bërë që forma e tij të mos jetë në maksimum si për skuadrën e tij, ashtu edhe për Kombëtaren.

Në një rrëfim për “Panorama Sport”, mesfushori i Mynih 1860 bën me dije dëshirat për të ardhmen dhe gjithashtu rrëfen emocionet që ka përjetuar duke ndjekur ndeshjet kualifikuese të kuqezinjve.

“Të jem i sinqertë, ajo ndeshje më ka lënë të gjithë natën pa gjumë. Mbase nga inati apo edhe ngaqë nuk na u realizua mundësia që të siguronim kualifikimin përballë tifozëve tanë dhe në një ndeshje si ajo me Serbinë. Megjithatë, futbolli i tillë është”, shprehet futbollisti 27- vjeçar. Për momentin, Rama është duke punuar për të lënë pas dëmtimin muskulor në kofshë, ku ka pësuar një këputje të aduktorëve (muskujve). Një dëmtim thuajse i ngjashëm me atë të Mario Gëces. “Po punoj që të rikthehem sa më shpejt i gatshëm në fillim për ekipin dhe pastaj edhe për Kombëtaren. Dua të jem mes lojtarëve që do të jenë në Francë”, rrëfen mes të tjerash Valdet Rama.