Federata e Futbollit e Kosovës ka mashtruar opinionin kinse Kosova U16 ka luajtur ndeshje miqësore me Italinë U16. Në fakt, ndeshja mes italianëve dhe kosovarëve nuk ka ndodhur.

Federata e Futbollit të Kosovës në fund të gushtit, njoftoi se Përfaqësuesja e Kosovës grupmosha nën 16 vjeç, do të marrë rrugë për në Itali, për të qenë pjesë e turneut të Paqes, së bashku edhe me Përfaqësuesen e Italisë, Bullgarisë dhe ekipin L’Aquila, njëherësh nikoqir i këtij turneu.

Tutje, FFK, njoftoi se ndër ndeshjet që Kosova do t’i luaj atje, është edhe ajo kundër përfaqësueses së Italisë, grup mosha nën 16 vjeç.

Dhe me datën 25 gusht, erdhi lajmi nga Apeninet, se Përfaqësuesja e Kosovës nën 16 vjeç, në stadiumin e qytetit të L’Aquilas, ka luajtur ndeshjen e parë kundër Italianëve nën 16 vjeç, e ku Kosova madje kaloi e para në avantazh, derisa italianët në vazhdim konsoliduan radhët e veta dhe barazuan disi në 1 me 1, që ishte edhe epilogu final.

Ky lajm i madh, doli edhe në ueb faqen zyrtare të FFK-së, me titull, Kosova U16 barazoi me Italinë.

Mirëpo, vetëm me një kërkim të thjeshtë, në ueb faqen zyrtare të Federatës së Futbollit Italian, shihet qartë, se ndeshja mes italianëve dhe kosovarëve, në grupmoshën nën 16 vjeç, nuk ka ndodhur.

Pas kthimit të ekipit të Kosovës nga Italia, fëmijët e përfaqësueses, sipas prindërve të tyre, e përjetuan rëndë këtë mashtrim, pasi sipas tyre ata ishin nisur të entuziazmuar dhe me pritje të mëdha se po i pret Italia.

Shqetësimit dhe pretendimit të prindërve se ata u mashtruan, i shkoi në gjurmë deri në fund, Sporti në KTV.

Për të qenë sa më të sigurt, ne kontaktuam nëpërmjet e-mail adresës, me zyrën për media të Federatës së Futbollit Italian e cila pas shqyrtimit të pyetjes sonë, se a është luajtur kjo ndeshje mes Kosovës dhe Italisë, u përgjigjën:

“Duke ju referuar kërkesës suaj më poshtë, ne ju informojmë juve se skuadra e involvuar në takim kundër Kosovës në fund të gushtit, nuk ka qenë përfaqësuesja jonë nën 16 vjeç, por një përzgjedhje regjionale e kësaj grupmoshe e kryer nga klubi L’Aquila”.

Edhe përkundër kësaj, Artan Govori, përgjegjës për përfaqësuese, i kontaktuar ditë më parë nëpërmjet telefonit insistonte se Kosova ka luajtur me Italinë.

Derisa këtë të mërkurë para kamerave, ai tregoi një tjetër version nga ajo që tha në telefon dhe nga ajo që kishin raportuar vet si Federatë.

Sipas Govorit Kosova U16, ka luajtur me ekipin B të grupmoshës nën 16 vjeç, dhe pastaj me ekipin L’Aquila.

Mirëpo, Sporti në KTV, ka siguruar edhe video xhirimet nga këto dy takime.

Në të dyja ndeshjet, shihet qartë se lojtarët nuk bartin fanellat e Italisë, por bartin fanellat e klubit L’Aquila.

Njëri takim, i raportuar si kundër Italisë, përfundoi 1me1.

Derisa i dyti , ndaj po këtij ekipi , pra nikoqirit L’Aquila , përfundoi në të mirë të Kosovës me rezultat 2:1.

Kurse në të njëjtin turne, Italia nën 16 vjeç, zhvilloi vetëm 1 ndeshje, e cila edhe është e regjistruar në kalendarin zyrtar të Federatës së Futbollit Italian.

Me fanella të kaltra e jo kuq e zi sikurse të L’Aquilas , siç shihet edhe në këtë video xhirim , “Azzurët” , deklasuan Bullgarët me rezultat 5:0.

Pra , veç faktit se as Burkina Faso nuk e merr seriozisht kombëtaren A të Kosovës , del që me trajtim dhe qasje jo serioze , konsiderohen edhe të rinjtë e Kosovës , që nuk mund të zhvillojnë ndeshje ndaj moshatarëve të tyre , edhe pse janë pjesë e të njëjtit turne.