Trembëdhjetë muaj pas Botërorit të futbollit, Brazil 2014, ka nisur numërimi mbrapsht. Lojërat Olimpike, Rio 2016 kanë hyrë në vitin e fundit para organizimit. Edicioni i 31-të i Olimpiadës në tokën braziliane është edhe i pari në histori në Amerikën e Jugut. 5 Gushtin e ardhshëm zhvillohet ceremonia e hapjes, me evenimentin që përfundon më datë 21 Gusht. Por, Rio de Janeiro nuk duket aspak gati.

Raportet më të fundit ndërkombëtare theksojnë se deri më tani janë gati vetëm 15 për qind e impianteve olimpike. Edhe pse organizatorët pretendojnë të ndjekin shembullin e “Lojërave perfekte” në Londër 2012, synimi duket i vështirë. Një vit përpara Olimpiadës, në kryeqytetin anglez kishte përfunduar 80 për qind e infrastrukturës. Fshati Olimpik që duhej të ishte një “parajsë në tokë” në Copacabana, duket një kantier i hapur. Mes incidenteve dhe vonesave në ndërtimin e strukturave sportive, por edhe atyre të transportit metropolitan, kostot rriten për çdo ditë.

Ashtu si ndodhi për Kupën e Botës, parashikohet që fatura financiare të jetë rreth 12 miliardë Euro. Tjetër shqetësim madhor është ndotja. Alarmi përfshin të gjithë zonën detare të Copacabana, Lagoa Rodrigo de Freitas, aty ku do të zhvillohen garat me kanoe dhe Marina da Gloria për garat me vela. Ekspertët e shëndetit paralajmërojnë se në ujërat e ndotura të Rio-s janë të pranishëm 37 lloje virusesh të dëmshëm për shëndetin e atletëve dhe 99 përqind e konkurrentëve rrezikohen nga infeksionet.

Nëse nuk do të merren masa drastike në vitin e mbetur, 15 mijë sportistët duhet ti nënshtrohen vaksinimit në masë. Atletet dhe stafi që janë në kontakt me ujin rrezikojnë të preken nga Hepatiti A. Mes shkaqeve kryesore të ndotjes janë lagjet e periferisë së Rio-s, të njohura ndryshe edhe si “Favelas”, ku mungojnë kanalizimet dhe ndryshe nga luksi i zonës metropolitane, jetojnë me kushte të ngjashme si të botës së tretë.

200 mijë policë dhe ushtarë me uniformë do të jenë të impenjuar gjatë Olimpiadës, me kosto një miliard Euro. Në vendin e rekordit botëror për dhunën policore sipas Amnesty International, me 56 mijë të vdekur në vitin 2012, premtojnë se do të jenë gati. Mes sambas dhe gjakderdhjes, Rio luan kartën e fundit, ku edhe një herë ndjek një ëndërr nëpërmjet sportit.