Ish-sulmuesi i njohur brazilian, Romario, ka akuzuar FIFA-n, duke e cilësuar si “presidentin e vërtetë të Brazilit”, pas ngjarjeve të ditëve të fundit, duke akuzuar organizatorët e këtij aktiviteti. Sipas tij, këto para do të ishin shpenzuar më mirë për të ndërtuar mijëra shkolla për fëmijë.

“Vazhdimi i këtij aktiviteti është mungesë respekti dhe tregon se janë njerëz të paskrupullt. Këto para të hedhura nëpër stadiume deri tani do të mjaftonin për të ndërtuar 8 mijë shkolla, 39 mijë autobusë për shkolla apo 28 mijë kënde sportive në të gjithë vendin”, ishte deklarata e Romarios, i cili tashmë është një politikan dhe anëtar i Parlamentit në Brazil.

“Paratë që po hidhen në stadiumin “Mane Garrinça” në Brazilia, mund të përdoreshin lehtësisht për të ndërtuar 150 mijë banesa për familjet e shtresave të varfra që nuk i kanë”, tha ai.

“Presidenti i vërtetë i vendit tonë është FIFA, ka vendosur një shtet brenda shtetit. Nuk paguajnë taksa. Hyjnë e dalin, vendosin këtu tendat e cirkut të tyre sipas qejfit dhe pastaj marrin gjithçka me vete”, ishte kritika e radhës së Romarios, i cili gjithmonë ka qenë kundër mënyrës së si po administroheshin përgatitjet për Botërorin 2014, pasi ka akuzuar shtetin brazilian për vjedhje të vazhdueshme të fondeve. (LajmeShqip.com)