Konferenca e sotme për shtyp e Zhoze Murinjos ka qenë një mesazh i qartë luftë ndaj atyre që e kanë kritikuar në këtë periudhë dhe të gjithë atyre që mendojnë se ai thjesht ka dëmtuar Real Madrid. Portugezi ka bërë të qartë se për të ardhmen nuk ka vendosur asgjë dhe do ta bëjë siç ka thënë më parë, në fund të edicionit pas një takimi miqësor me drejtuesit e Realit. Por në momentin kur i është pyetur nëse e quan bilancin trevjeçar te Reali si të mirë, ai ka nxjerrë letrën dha ka filluar të lexojë.

“Kur vlerësohet puna ime, flitet vetëm për tituj. Por faji është i imi, pasi kam fituar aq shumë sa pritshmëria është e madhe. Por e dija, ndaj kam ardhur i përgatitur me shënime. Kampionati i rekordeve në Spanjë më përket mua, sado që të përpiqeni të ma hiqni dhe do të shohim se kur do të jetë ndokush në gjendje ta thyejë. Ky klub kishte 20 vite pa fituar Kupën e Mbretit. Superkupa e Spanjës është një turne i vogël. Tre gjysmëfinalet radhazi në Ligën e Kampioneve, edhe pse nuk përputhen me egon time pasi nuk më pëlqejnë gjërat “thuajse”, nuk janë të lehta për t’u arritur”, tha ai duke lexuar më pas një listë të gjatë me emra të njohur.

“Toshak, Di Stefano, Antiç, Benhaker, Floro, Del Boske, Valdano, Iglesias, Kapelo, Heinkes, Hidink, Keiroz, Kamaço, Ramon, Luksemburgo, Lopez Karo, Shuster, Ramos, Pelegrini… Numëroj 18 trajnerë që në 21 vite kanë arritur vetëm 5 herë të çojnë Real Madrid në gjysmëfinalet e Ligës së Kampioneve. Kurse Murinjo i keq e arriti këtë gjë tre herë në tre vite. Por nëse kaq shumë vetë e arritën kaq pak herë, do të thotë se nuk është edhe aq e lehtë”, ishte batuta e Murinjos që ka lënë të shtangur gazetarët.

“Shpresoj që Reali të fitojë sa më parë Ligën e Kampioneve numër 10, me apo pa mua. me tifozët nuk kam pasur kurrë probleme, kanë të gjitha të drejtat të na vërshëllejnë kur humbim një ndeshje apo kur eliminohemi nga Liga e Kampioneve. Respektoj shtypin, mendoj se është i mirë, por vazhdoj të jem i bindur se nuk duhet të udhëtoni në avion me ekipin, të mos jeni në çdo stërvitje, të mos vendosni ju formacionin dhe të mos hedh në fushë fëmijët që keni për zemër”, ishte mesazhi i tij për mediat, ndërsa më pas ka lëshuar një shigjetë të qartë në adresë të Iker Kasijas, ndonëse nuk i ka përmendur emrin.

“Nuk kam asnjë problem me lojtarët, të paktën ata që duan të trajtohen si të barabartë. Kam probleme me ata që mendojnë se janë sipër të tjerëve. Nëse ka një gjë që mund të kisha bërë më shumë, ishte të blija Diego Lopez që pas vitit tim të parë këtu dhe ta aktivizoja menjëherë, ai është pengu im”, ishte goditja përfundimtare ndaj figurës së Kasijas.

Pas disa vlerësimeve për Barcelonën, duke e cilësuar skuadrën më të mirë në botë në 20-30 vitet e fundit, Murinjo ka bërë të qartë se nëse do të ikte, do ta bënte si gjithmonë.

“Ditën që do të largohem nga këtu, nuk do t’ju tregoj pse po e bëj këtë gjë. Jam larguar gjithmonë me fjalë të mira nga klubet ku kam qenë dhe situata nuk do të ndryshojë tani”., ishte deklarata e Murinjos. (LajmeShqip.com)