Interi i sezonit 2013-2014 do të bazohet kryesisht te të rinjtë dhe këtë fakt e kanë konfirmuar vetë drejtuesit e skuadrës zikaltër. Drejtori i përgjithshëm i Interit, Marko Fasone, ka bërë bilancin e “blerjeve” të deritanishme për skuadrën, duke filluar që nga konfirmimi i blerjes së talentit të Sampdorias, Mauro Ikardi.

“Bilanci për momentin na ndalon shpenzime të çmendura, por kemi arritur të mbyllim 5 goditje interesante për sezonin e ardhshëm: Laksalt, Kampanjaro, Andreolli, Bota dhe Ikardi”, shpjegoi drejtuesit i Interit.

Ikardi është një nga emrat që çdo skuadër e madhe e Serisë A ka ndjekur me vëmendje, por argjentinasi i Sampdorias, një nga miqtë e Lionel Mesit, ka zgjedhur pikërisht zikaltërit për të vazhduar karrierën e tij.

Nga ana tjetër, presidenti Morati ka hedhur poshtë zërat për largimin e portierit Samir Handanoviç, duke bërë të qartë se dëshironte të mbante përsëri sllovenin në radhët e skuadrës së tij dhe nuk mendonte për një shkëmbim me Sançez të Barcelonës.

“Sançez është një lojtar shumë i mirë por ato që bëjnë diferencën janë lojtarë të tjerë, të vështirë për t’u blerë. Handanoviç është një kolonë mbështetëse për ne, do të mundohemi ta mbajmë”. (LajmeShqip.com)