Ronaldinjo do të jetë përsëri kapiteni i Brazilit në ndeshjen miqësore ndaj Kilit, duke iu afruar më shumë edhe kthimit të tij si një titullar i rregullt në kombëtaren e drejtuar nga Luiz Felipe Skolari.

Trajneri ka konfirmuar se shiriti do t’i shkojë përsëri 33 vjeçarit në atë që është ndeshja e fundit përgatitore për Brazilin para se të organizojë Kupën e Konfederatave në qershor.

Ashtu si në miqësoren kundër Bolivisë të përfunduar me rezultatin 4-0, Skolari ka grumbulluar vetëm lojtarë që luajnë në Brazil, për të parë më mirë talentin vendas dhe alternativat e mundshme për aktivitetin e kësaj vere dhe sidomos asaj pasardhëse, Botërorit 2014.

Sipas trajnerit, vetëm njëri mes Ronaldinjo dhe Kaka ka vend në kombëtaren e tij dhe për momentin, fantazisti i Atletiko Mineiro është më i avantazhuar për të fituar këtë vend në formacion.

“Ronaldinjo ka një avantazh pasi ka luajtur ndaj Bolivisë dhe ai do të luajë përsëri kundër Kilit. Ai është një lojtar i rëndësishëm për këtë skuadër. Dua që kapiteni të tregojë sjellje të mirë dhe të drejtojë skuadrën. Kjo është ajo që unë pres nga Ronaldinjo”, shpjegoi Skolari. (LajmeShqip.com)