Zhoze Murinjo ka lëshuar bombën e radhës, duke deklaruar se FIFA ka manipuluar në favor të Vicente Del Boske votimin për çmimin “Trajneri i Vitit”, të akorduar gjatë mbrëmjes gala ku u dha “Topi i Artë”.

Tekniku portugez e ka bërë këtë deklaratë të bujshme në televizionin kombëtar portugez “RTP”, duke akuzuar edhe trajnerin spanjoll për miqësi brenda institucionit që drejton futbollin botëror.

“Nuk shkova në ceremoni pasi FIFA ishte në dijeni të disa parregullsive në votime, por nuk bëri asgjë për t’i rregulluar. Asaj i mungoi transparenca. Disa miq të mi më telefonuan për të më thënë se më kishin votuar, por në fund vota e tyre ishte numëruar për Del Bosken. Me sa duket, trajneri i kombëtares spanjolle ka miqësi atje lart që kanë më shumë vlerë se unë”, ishte deklarata e Murinjos që pritet të sjellë reagime të shumta.

Ndërkohë, trajneri portugez ka folur edhe për “Realmadrid TV” rreth duelit kundër Gallatasarajit dhe asaj që pret nga sfida e radhës se Ligës së Kampioneve.

“Duhet të shkojmë medoemos në Stamboll me një avantazh të vogël. Real Madrid nuk duhet të jetë kurrë i kënaqur që shkon në çerekfinalet e turneut dhe duhet të mendojë gjithmonë që të arrijë maksimumin”.

“Përballë kemi një skuadër me njerëz që e njohin mirë Ligën e Kampioneve dhe ku janë dy fitues si Drogba e Shnajder, lojtarë që kanë luajtur në skuadrat më të mira si Ebue te Arsenali, Felipe Melo te Juventus, Riera te Liverpuli e Muslera te Lacio. Isha në Turqi dhe pashë një tifozeri që nuk ekziston në asnjë vend tjetër. Luanin 700 kilometra larg Stambollit, por në stadium kishte 15 mijë tifozë të Gallatasarajit. Mendonim se Dortmundi apo Mançesteri do të ishte i vështirë, por unë them se kjo është skuadër më e vështirë”, deklaroi trajneri portugez. (LajmeShqip.com)