Pavel Nedved, ish-mesfushori i Juventusit dhe tashmë pjesë e stafit drejtues të bardhezinjve, i ka hapur rrugën një skenari të bujshëm të merkatos, kthimit të Zlatan Ibrahimoviç.

“Kush nuk do ta dëshironte një lojtar si Ibrahimoviç? Nuk e fsheh faktin që një ditë do të më pëlqente që ta ktheja këtu. Unë e vlerësoj atë në të njëjtin nivel me fenomenë si Mesi apo Kristiano Ronaldo, është një nga ata lojtarë që do të rritnin nivelin e çdo skuadre ku shkojnë. Edhe Kavani më pëlqen shumë, është një nga sulmuesit që nuk kufizohet vetëm me shënimin e golave, por ndihmon edhe skuadrën gjithashtu. Për më tepër është një djalë i shkëlqyer, besimtar dhe me këmbë në tokë, do të ishte një lojtar ideal për Juventusin”, u shpreh Nedeved i cili është një nga bashkëpunëtorët e afërt të drejtorit sportiv Bepe Marota për merkaton e klubit.

Më pas, Nedved i ka dhënë fund të gjitha zërave për një largim të mundshëm të trajnerit Antonio Konte, i cili është përfshirë nga zërat e merkatos që e shohin atë duke lëvizur drejt Çelsit apo Real Madrid në këtë verë.

“Ne jemi të qetë. Antonio Konte do të qëndrojë me ne derisa të dojë ai, pasi është vlera jonë shtesë në krahasim me të tjerët. Derisa të jem unë në klub, nuk e lë të largohet. Që kur ishte futbollist na udhëhiqte në fushë, por nuk e prisja të ishte kaq i mirë si trajner, mendoj se mund të hyjë në histori”, deklaroi Nedved. (LajmeShqip.com)