Xhulian Rrudho, ish-futbollisti i kombëtares U-21 të Shqipërisë, është arrestuar sot nga policia italiane pasi është arrestuar në flagrancë ndërsa shpërndante kokainë bashkë me një tjetër shtetas shqiptar.

Sipas asaj që raportojnë mediat italiane, ish-futbollistit i cili në të kaluarën ka milituar edhe në disa skuadra të njohura në Itali si Kievo Verona e Ankona, ndiqej prej kohësh nga policia italiane.

Bashkë me shqiptarin tjetër, Mimet Zeqiri, Rrudho fshihte drogën nën tokë në parkun e Posatora. Atje shkonin dhe e merrnin rregullisht për ta shitur pastaj në një nga sheshet e qytetit të Ankonës, ndërsa për të lëvizur përdornin vetëm mjetet publike.

Policia i ka ndalur pikërisht në një autobus, pasi i ka ndjekur të dy shqiptarët. Sapo janë ulur nga autobusi, Rrudho dhe Zeqiri janë ndalur nga policia e cila i ka gjetur atyre në xhepa 150 gram kokainë të pastër.

Pas kontrollit në banesën e tyre, janë zbuluar edhe mjetet për paketimin e drogës, që kanë vërtetuar se ish-futbollisti i kombëtares U-21 tashmë ishte kthyer në një shpërndarës të mirëfilltë droge.

25 vjeçari gjendet në burg, ku pritet t’i përgjigjet pyetjeve të hetuesve, ndërsa rrezikon një periudhë të gjatë pas hekurave. (LajmeShqip.com)