Familja Murinjo bëhet gati për kthimin në Londër. Gazetat britanike dhe ato spanjolle kanë publikuar lajmin se gjatë ditëve të fundit, në kryeqytetin anglez kanë qëndruar gruaja dhe vajza e trajnerit portugez, më këtë të fundit që pritet të vazhdojë edukimin e saj në Kolegjin e Arteve të Kamberuell.

Sipas “Daily Star”, vajza e Murinjos ka prenotuar gjithçka për vitin e ardhshëm, ndërsa ka zgjedhur edhe lëndët që do të ndjekë si studente e këtij kolegji, pasi 16 vjeçarja dëshiron të diplomohet për arte.

Sipas mediave britanike, kjo lëvizje e familjes Murinjo është hapi i parë i teknikut për kthimin në Angli, duke filluar që nga sezoni i ardhshëm. Por gazeta “AS” ka bërë të qartë se kjo nuk do të thotë detyrimisht që do të marrë drejtimin e një skuadre angleze, pasi ekziston gjithmonë hipoteza e Paris Sent Zhërmen.

Murinjos i mjafton të udhëtojë 2 orë me trenin “Eurostar” për të kaluar nga kryeqyteti anglez në atë francez dhe projekti i miliarderëve të Katarit është mjaft tërheqës për trajnerin që dëshiron të fitojë në çdo vend që shkon. Nëse parisienët bëjnë realitet edhe blerjen e Kristiano Ronaldos, atëherë për portugezin nuk ekziston më asnjë arsye që ta mbajë të lidhur me Real Madrid, ndonëse ka një kontratë deri në vitin 2016 me klubin spanjoll. (LajmeShqip.com)