Fitorja 2-0 ndaj Getafe nuk ka kënaqur Diego Simeone, i cili ka shprehur hapur pakënaqësinë për mënyrën se si po trajtohet ylli i skuadrës së tij, Radamel Falkao, për të cilin gjyqtarët nuk kanë të njëjtin kujdes si ndaj Kristiano Ronaldos e Lionel Mesit. 

“Nuk më pëlqen të jap mendime për gjyqtarët, por kur flas e bëj për qëllime të mira. Është e dukshme që jepet faull kur preken Mesi e Ronaldo, por nëse dikush godet Falkaon nuk ndodh asgjë. Shpresoj që në të ardhmen të jenë më të vëmendshëm”, tha ai.

Ndonëse ekipi i tij aktualisht mban vendin e dytë në renditje dhe teorikisht është rivali më i afërt i Barcelonës kryesuese, Simeone thuajse nuk sheh as katalanasit e as Real Madrid, i bindur se ekipi i tij ka kundërshtarë të tjerë me të cilët lufton për një vend në Ligën e Kampioneve në sezonin e ardhshëm.

“Vazhdojmë të ecim para me taktikën tonë për të vazhduar nga njëra ndeshje në tjetrën, por është e qartë që kjo javë ishte e mirë për ne pasi rivalët për një vend në Champions u mundën. Është shumë e rëndësishme të mbledhësh pikë në këtë fillim kampionati, në mënyrë që në shkurt dhe mars të jemi në një pozicion sa më të favorshëm”, deklaroi trajneri argjentinas. (LajmeShqip.com)