Mançester Junajtid është kualifikuar në fazën e eliminimit direkt të Ligës së Kampioneve duke siguruar njëkohësisht edhe vendin e parë pas fitores 3-1 në fushën e Bragës.

“Djajtë e kuq” kanë qenë në disavantazh deri në minutat e fundit të ndeshjes, pas penalltisë së Alan për vendasit, por kur Ferguson vendosi të aktivizonte Van Persin, situata ndryshoi për ekipin anglez pasi ishte pikërisht holandezi që përfitoi nga një gabim i portierit kundërshtar për të shënjuar golin e barazimit në minutën e 80-të. Pak minuta më vonë ishte Runi që kaloi në avantazh skuadrën e tij me një 11-metërsh, ndërsa Hernandez vulosi rezultatin përfundimtar me golin e shënuar në kohën shtesë. Fitorja e Gallatasaraj në fushën e Kluj në ndeshjen tjetër të këtij grupi, i ka dhënë mundësinë skuadrës së Ferguson të kualifikohet lehtësisht si ekipi i parë në grup, por edhe ka hapur plotësisht garën mbi atë që do ta ndjekë në fazën tjetër të turneut.

Në grupin E, Juventusi ka fituar lehtësisht 4-0 në fushën e vet përballë Nordsjealleand, duke gjetur një fitore pas 3 barazimesh radhazi. Juventinët janë tani 1 pikë pas Çelsit e Shakhtar Donetsk që ndajnë vendin e parë në grup dhe që kanë dhuruar një sfidë të jashtëzakonshme mes tyre. Dukej sikur skuadra ukrainase kishte marrë një pikë të rëndësishme në Angli pasi arriti të mbante nën kontroll fituesen në fuqi të turneut. Por Moses me golin e tij të minutës ë 94-t i ka dhënë suksesin ekipit të Di Mateos, që rrezikonte seriozisht të eliminohej që në fazën në grupe nëse nuk fitonte sot.

Bajern Mynih ka rikthyer diktatin në kreun Grupit F, duke mundur me rezultatin tenistik 6-1 francezët e Lilës. Bavarezët kanë shënuar një rekord të ri në Ligën e Kampioneve, duke u bërë ekipi i parë që kryeson 5-0 që në pjesën e parë në këtë aktivitet, ndërsa fitorja i mban në vendin e parë përkrah Valencias që mundi 4-2 bjellorusët e BATE. (LajmeShqip.com)

GRUPI E

Çelsi-Shakhtar Donetsk           3-2

6’ Torres, 40’ Oskar, 90’+4’ Moses / 9’, 47’ Uillian

Juventus-Nordsjaelland            4-0

6’ Markisio, 23’ Vidal, 37’ Xhovinko, 75’ Kualjarela

Renditja: Çelsi 7 pikë, Shakhtar Donetsk 7, Juventus 6, Nordsjaelland 1.

GRUPI F

Valencia-BATE                        4-2

26’ Jonas, 29’ (p) Soldado, 51’, 86’ Feghouli / 53’ Bresan, 83’ Mozolevski

Bajern Mynih-Lilë                     6-1

5’ Shvajnshtajger, 18’, 28’, 33’ Pizarro, 23’ Roben, 66’ Kros / 57’ Kalu

Renditja: Bajern Mynih 9 pikë, Valencia 9, BATE 6, Lilë 0.

GRUPI H

Braga-Mançester Junajtid        1-3

49’ (p) Alan / 80’ Van Persi, 84’ (p) Runi, 90’+2’ Hernandez

Kluj-Gallatasaraj                      1-3

53’ Sougou / 18’, 61’, 74’ Jilmaz

Renditja: Mançester Junajtid 12 pikë, Gallatasaraj 4, Kluj 4, Braga 3.