Trajneri i Bajern Mynih, Jup Heinkes, ka bërë të ditur se pret “një natë speciale” në ndeshjen e Ligës së Kampioneve që skuadra e tij luan sot përballë Valencias. Bavarezët do të luajnë përsëri në këtë turne në stadiumin “Allianz Arena”, aty ku pak muaj më parë humbën finalen përballë Çelsit.

“Mendoj se Liga e Kampioneve apo ndeshjet evropiane në përgjithësi janë shumë speciale. Kështu është për lojtarët dhe kështu është edhe për mua si trajner. Duhet të them se është e rëndësishme për ne që të kemi një fillim të mirë në sezonin ri, në mënyrë që të provojmë përsëri të arrijmë deri në fund në sfidën e Ligës së Kampioneve”.

Sipas Heinkes, ndaj Valencias do të kthehen në fushën e lojës dy nga yjet e kësaj skuadre, Frank Riberi dhe Arjen Roben, të cilët kanë munguar në javët e fundit për shkak dëmtimesh.

“Të gjithë e dinë që ato morën pjesë në stërvitje, gjatë të gjithë seancës me lojtarët e tjerë. Tani të shohim si do të reagojnë deri para takimit. Me atë që pashë në stërvitje, them se të dy do të jenë gati për të luajtur”, deklaroi Heinkes. (LajmeShqip.com)