Rezart Taçi mund të jetë pronari i ardhshëm i klubit të Malaga në kampionatin spanjoll. Lajmin e konfirmojnë mediat prestigjioze spanjolle, të cilat bëjnë të ditur për fillimin e bisedimeve mes Taçit dhe sheikut Al-Tani, pronari aktual i ekipit që këtë sezon luan në Ligën e Kampioneve.

Problemet e mëdha financiare dhe pamundësia e zhvillimit të investimeve nga sheikët e Katarit në zonën turistike të Malagas, kanë bërë që sheikët të vendosin të nxjerrin në shitje klubin. Sipas asaj që konfirmojnë media të ndryshme spanjolle, ata u kanë borxhe shumë prej lojtarëve aktualë të cilëve nuk u kanë paguar rrogat në muajt e fundit dhe prandaj duan të shesin sa më parë për të mos shpenzuar më para.

Fillimisht radioja sportive “Cadena Cope”, e më pas edhe gazeta prestigjioze spanjolle “AS”, lajmëruan se kanë nisur bisedimet me përfaqësuesit e Rezart Taçit, i cili po mendon seriozisht për blerjen e këtij klubi. Të gjitha burimet pranë klubit flasin për bisedime në fazën e avancuar mes palëve, ndonëse shumëkush ka hedhur dyshime mbi realizimin e marrëveshjes duke parë të kaluarën e Taçit në ambientet futbollistike.

Taçi ia ka arritur qëllimit që të bëhet aksioner te Milan, duke u bërë pjesë kuqezinjve që dy vite më parë. Por mediat spanjolle kujtojnë njëkohësisht edhe tentativën e tij për një blerë një ekip në Itali, ky fillimisht kërkoi Livornon e më pas Bolonjan. Ata kanë kujtuar se biznesmeni shqiptar nuk është shembulli i korrektësisë pikërisht për çështjen e Bolonjës, të cilën e braktisi pak ditë para se të hidhte firmën në kontratën e blerjes.

Sheikët e blenë Malagan për 36 milionë euro në vitin 2010, por mendohet se shitja e këtij klubi do të kushtojë rreth 20 milionë euro, pasi pronari i ardhshëm do të trashëgojë edhe borxhet që drejtuesit kanë ndaj lojtarëve dhe nënkontraktorëve që janë në shërbim të klubit. (LajmeShqip.com)