Valentino Rosi ka konfirmuar se në vitin e ardhshëm ai mund të mos jetë më pjesë e skuadrës së Dukatit në MotoGP, pasi ka marrë oferta të tjera të rëndësishme. Kjo deklaratë e pilotit italian erdhi vetëm një ditë pasi Horge Lorenco zbuloi se pritej kthimi i “Doktorit” në radhët e Jamahas, për të formuar edhe një herë një dyshe të pandalshme.

“Deri tani nuk kam vendosur asgjë për vitin 2013. Po flas me Dukatin, por kam edhe opsionet tjera që mund të diskutoj”, ishin fjalët e Valentino Rosit, i pranishëm në konferencën për shtyp par fillimit të fundjavës së Çmimit të Madh të SHBA në Laguna Seka. “Vendimin tim do ta marr gjatë pushimit veror”, shtoi më pas ai.

“Situata është shumë e qartë, por unë nuk kam vendosur ende pasi është shumë herët. Kam folur shumë me drejtuesit e Dukatit për sezonin e ardhshëm dhe po pres ende për disa detaje të motorit të ri dhe një draft të kontratës. Por nuk mund ta mohoj që kam edhe opsione të tjera”, shpjegoi piloti italian.

Rosi ka patur shumë probleme gjatë dy viteve të tij te Dukati, ku nuk ka qenë asnjëherë në gjendje të luftojë jo vetëm për titull, por edhe për një vend në podium, ndërsa ka siguruar vetëm një të tillë, bilanc zhgënjyes për një pilot që dëshiron të jetë protagonist kryesor në çdo garë. (LajmeShqip.com)