Mbrojtësi i djathtë i Barcelonës, Dani Alvesh, pranoi gjatë konferencës së tij për shtyp se kishte kaluar një periudhë mjaft të keqe në fundin sezonit të kaluar, kur u përhapën shumë zëra për largimin e tij nga katalanasit.

“Kishte thashetheme për largimin tim dhe sinqerisht më bezdisi fakti që klubi nuk më doli në mbrojtje”, tha lojtari. “Por e kuptoj disi këtë vendim pasi klubi shpesh sheh interesin e tij para atij të lojtarëve. Kur dëgjova thashethemet dhe askush nuk i përgënjeshtroi, u duk sikur kishin humbur besimin te unë dhe nuk e kam fjalën për Tito Vilanovën”, tha Alvesh duke lënë të kuptohet se ky mund të ishte një mesazh indirekt për Guardiolën, ai që mendohet se ishte personi që dëshironte largimin e tij nga katalanasit.

“Tito ka besim te unë dhe unë dua ta shpërblej këtë besim. Më ka thënë gjithmonë që më dëshiron në ekip. Unë për vete e kam fituar respektin e njerëzve me punë dhe dëshiroj të vazhdoj në të njëjtën mënyrë”.

“Vazhdoj të jem ambicioz si në ditën e parë dhe gjendem në klubin më të mirë në botë. Dua të shpërndaj sa më parë të gjitha dyshimet që njerëzit kanë ndaj meje”, tha mbrojtësi brazilian. (LajmeShqip.com)