Zhoze Murinjo dhe Rikardo Kaka janë takuar gjatë ditës së sotme në “Santiago Bernabeu” për të përcaktuar përfundimisht të ardhmen e lojtarit brazilian. Ish-“Topi i Artë” në vitin 2007 dëshiron të dijë se çfarë duhet të presë nga ky sezon dhe sipas shtypit spanjoll, përgjigjet që i ka dhënë Murinjo nuk kanë qenë ato që priste.

Sipas “La Sexta”, Murinjo i rekomandoi Kaka që të pranonte ndonjë nga ofertat që i kanë ardhur nga klubet e MLS në Shtetet e Bashkuara të Amerikës. Në këto klube ai mund të mbajë rrogën e tij aktuale. Në të kundërt, i është kërkuar lojtarit që të ulë ndjeshëm pretendimet ekonomike për t’u kthyer të luajë në Brazil, aty ku vazhdon të jetë një idhull i tifozerisë, po ku klubet nuk kanë aq shumë para sa për të paguar 9 milionë eurot që përfiton aktualisht. Me pak fjalë, trajneri i ka bërë të ditur brazilianit se është i padëshiruar dhe se nuk bën pjesë në planet e tij, ndaj bën mirë të largohet dhe të gjejë një klub ku të luajë.

Duhet kujtuar se Reali e pagoi Kaka 65 milionë euro tre sezone më parë kur e bleu nga Milan, ndërsa tani kërkon të përfitojë gjysmën e këtyre parave, me shpresën që të shërbejnë për të blerë Luka Modriç nga Totenhem.

Si Kaka, ashtu dhe Murinjo, nuk kanë lëshuar deklarata pas largimit nga ambientet e klubit, por duhet theksuar se futbollisti brazilian ishte i shoqëruar nga babai i tij, Bosko Leite, i cili është njëkohësisht edhe menaxher i futbollistit në fjalë. (LajmeShqip.com)