Fernando Alonso me Ferrari ka arritur një sukses të merituar në Çmimin e Madh të Gjermanisë në pistën e Hokenhaim, duke treguar se tani ai është favoriti kryesor për titullin kampion në këtë sezon.

Spanjolli që kryeson renditjen e kampionatit botëror, ka thelluar edhe më tepër diferencën me ndjekësit, ndërsa në këtë garë që e filloi dhe e mbaroi në venin e parë, ka arritur të mbajë shumë mirë mbrapa si Sebastian Vetel me Red Bull, ashtu edhe Xhenson Baton me MekLaren.

Alonso arriti të mbante gjithmonë një distancë prej rreth 1 sekonde me dy ndjekësit e tij dhe në xhirot e fundit u ndihmua edhe nga fakti se dy pilotët që kishte pas filluan të duelonin me njëri-tjetrin për vendin e dytë. Në fund doli fitimtar Vetel, edhe pse manovra e tij e parakalimit ndaj Baton në xhiron e parafundit nuk ishte krejtësisht e rregullt.

Suksesi çoi në 34 pikë distancën që ka Alonso nga ndjekësi më i afërt në kampionat, Mark Ueber, i cili u desh të kënaqej me vendin e 8-të në këtë garë. Vendi i katërt i kaloi Kimi Raikonen, që zhvilloi si rrallëherë një garë të qetë, ndërsa pas tij u renditën Kobajashi dhe Perez, me dy makinat Sauber. Tre gjermanët Shumaker (7), Hulkenberg (9) dhe Rosberg (10), plotësuan radhën e makinave që përfunduan në zonën e pikëve.

Ndërkohë, një incident në xhiron e parë nxori praktikisht nga gara Luis Hemilton dhe Feilpe Masan, duke i vonuar shumë në bokse për ndërrimin e pjesëve të makinës dhe duke bërë që i pari të braktiste garën kur kishin mbetur edhe 10 xhiro nga fundi, ndërsa i dyti të përfundonte i 13-ti. (LajmeShqip.com)

Renditja e Botërorit për pilotë të Formula 1

154      Fernando Alonso (Ferrari)

120      Mark Ueber (Red Bull-Reno)

118      Sebastian Vetel (Red Bull-Reno)

95        Kimi Raikonen (Lotus-Reno)

92        Luis Hamilton (MekLaren-Mercedes)

76        Niko Rosberg (Mercedes)

65        Xhenson Baton (MekLaren-Mercedes)

61        Sebastian Groszhan (Lotus-Reno)

47        Serxho Perez (Sauber-Ferrari)

31        Kamui Kobajashi (Sauber Ferrari)