Çiklisti gjerman Andre Gripel ka arritur të fitojë etapën e tretë në këtë Tur të Francës falë suksesit në sprint në etapën e 13-të, duke mundur pikërisht atë që mban fanellën e gjelbër të sprinterëve më të mirë, Peter Sagan.

Ky i fundit ishte çiklisti që kishte fituar më shumë etapa në këtë edicion, por tashmë është arritur nga Gripel i cili regjistroi suksesin e tretë, duke u bërë gjermani i parë që nga koha e Erik Zabel që fiton 3 etapa në Turin e Francës, për herë të fundit në edicionin e vitit 2001.

Favoriti për të fituar etapën në metrat e fundit ishte norvegjezi Boason Hagen, i cili u ndihmua nga mbajtësi i fanellës së verdhë, Bredli Uigins, që të kalonte ngjitjen e fundit dhe të shfaqej i freskët në finish.

Por Gripel dhe Sagan arritën ta kalonin atë dhe dueluan në metrat e fundit para se suksesi t’i shkonte gjermanit, të cilit këtë radhë i mungoi rivaliteti i Marak Kavendish që kaloi në krizë gjatë ngjitjeve të kësaj etape.

Në klasifikimin e përgjithshëm, asgjë nuk ka ndryshuar në kreun e renditjes, ku Bredli Uigins duket se po shkon qetësisht drejt një suksesi në Turin e Francës pasi edhe skuadra e tij po bën maksimumin duke punuar vetëm për të shpallur britanikun kampion. (LajmeShqip.com)

Renditja e Turit të Francës pas etapës së 13-të

1. Bredli Uigins                    59 orë 32’32” 

2. Kristofer From                 +2’05”

3. Vinçenco Nibali               +2’23”

4. Kadel Evans                      +3’19”

5. Jurgen Van Den Bruk      +4’48”

6. Haimar Zubelda               +6’15”

7. Tixhei Van Garderen       +6’57”

8. Janez Brajkoviç                +7’30”

9. Pierr Roland                       +8’31”

10. Tibo Pino                          +8’51”