Tomas Myler i ka dhënë fund të gjitha zërave për një transferim të mundshëm të tij nga radhët e Bajern Mynih, duke i deklaruar “dashuri të përjetshme” bavarezëve.

Lojtari 22 vjeçar mendohej se po shihte të vazhdonte karrierën në një skuadër tjetër, duke pranuar se i pëlqente Inter. Dukej se kjo situatë ishte krijuar meqë në sezonin e fundit, Myler ishte kthyer në një zëvendësues, duke humbur edhe formacionin titullar përballë Toni Kros në ndeshjet e rëndësishme të Ligës së Kampioneve kundër Real Madrid.

Por tani duket se ai ka marrë sigurinë nga klubi se do të jetë protagonist absolut në sezonin e ardhshëm, sidomos pasi drejtuesit bavarezë konfirmuan se nuk do të bënin blerje të tjera në repartin e mesfushës apo sulmit.

“Të gjithë ata që më njohin e dinë që Bajern është klubi im. Nuk jam personi që ndërpres kontratën nëse situata në klub është e papëlqyeshme, me sinqeritet po ju them se nuk kam asnjë synim që të largohem”, tha ai për “Bild”.

“Unë jam një futbollist i Bajern me zemër dhe kjo nuk do të ndryshojë kurrë”, tha lojtari i cili ka ardhur te ky klub në vitin 2000 kur ishte vetëm 10 vjeç dhe që nga debutimi mes profesionistëve 4 vite më parë, ka regjistruar mbi 190 ndeshje zyrtare me fanellën e kësaj skuadre. (LajmeShqip.com)