Italia ka komplikuar shumë kualifikimin e saj në çerekfinalet e Euro 2012 pasi tani fatet e kësaj skuadre nuk janë krejtësisht në dorën e saj pas barazimit 1-1 me Kroacinë që e la me 2 pikë në renditjen e Grupit C.

Të kaltrit e Prandelit zhvilluan një pjesë të parë të mirë dhe kaluan në avantazh me meritë, pas një goditje dënimi perfekte te Pirlos. Por në pjesën e dytë, skuadra italiane e uli shumë ritmin e lojës dhe i dha mundësinë kroatëve që të rrezikonin dhe të gjenin rrugën e rrjetës me anë të Manxhukiç, i cili mposhti Bufon pas një pavëmendje të mbrojtjes së kaltër.

“Nëse nuk arrin të mbyllësh ndeshjen, sigurisht që më pas do të pendohesh”, ishin fjalët e trajnerit Prandeli pas kësaj sfide, ku ai është kritikuar se ka vazhduar t’i qëndrojë besnik idesë së aktivizimit të Mario Balotelit, përsëri zhgënjyes. Italisë tashmë nuk i mjafton vetëm fitorja me Irlandën për të kaluar në turin tjetër, pasi një barazim 2-2 apo me më shumë gola mes Spanjës dhe Kroacisë në ndeshjen e fundit i nxjerr ato jashtë Euro 2012.

Ndërkohë, Kroacia ka qenë në qiellin e shtatë pas këtij barazimi që ka patur shijen e fitores. “Me siguri as vendi ynë nuk e priste një rezultat të tillë. Tani kemi një shans shumë të mirë për të kaluar turin”, ka pranuar trajneri Biliç. (LajmeShqip.com)

Grupi C

Spanjë-Itali                   1-1

63’ Fabregas / 61’ Di Natale

Irlandë-Kroaci              1-3

19’ Sent Lexher / 3’, 49’ Manxhukiç, 43’ Jelaviç

Itali-Kroaci                   1-1

39’ Pirlo / 72’ Manxhukiç

Spanjë-Irlandë              4-0

4’, 70’ Torres, 49’ Silva,  83’ Fabregas

Renditja

Spanjë            4        5-1

Kroaci             4        4-2

Itali                 2        2-2

Irlandë           0        1-7

18.06.2012

Kroaci-Spanjë              20:45

Gdansk (Poloni)

Itali-Irlandë                 20:45

Poznan (Poloni)