Xhovani Dos Santos dhe Havier Hernandez shënuan në pjesën e parë të takimit ndërsa Meksika mundi 2-0 Brazilin në miqësoren e të dielës, duke mbyllur në mënyrë të suksesshme përgatitjet para eliminatoreve të Botërorit 2014. 

Kjo ishte ndeshja e dytë radhazi që të dy sulmuesit shënojnë nga një gol për kombëtaren e Meksikës, e cila do të luajë ndaj Guajanas të premten për të hapur turin gjysmëfinal të kualifikueseve të Botërorit për zonën e CONCACAF.

“Ndeshja ishte perfekte, pasi mundëm një kundërshtar të fortë dhe përgatitëm veten për kualifikueset”, ishte komenti i trajnerit meksikan, Hose Manuel De La Torre. Dos Santos shënoi golin e parë në minutë e 22-të, me një gjuajtje diagonale spektakolare, duke kaluar topin mbi portierin e ri brazilian, Rafael Kabral.

“Ajo ishte thjesht fat, ai po mundohej të harkonte në zonë dhe shënoi pa dashje”, ishte komenti i trajnerit të Brazilit, Mano Menezes.

Por sulmuesi meksikan tregoi vlerat e tij pak më vonë, kur fitoi një penallti pas një ndërhyrje të gabuar të Huan Hezus në zonë. Nga pika e bardhë gjuajti Hernandez i cili shënoi golin e dytë duke entuziazmuar tifozët e shumtë të pranishëm në stadium, të cilët iu gëzuan këtij suksesi si të ishte një ndeshje zyrtare dhe jo një miqësore ku Brazili kishte përdorur kryesisht ekipin olimpik. (LajmeShqip.com)