Trajneri i Gjermanisë, Joakim Lëv, është siguruar për vazhdimësinë e punës së tij, pavarësisht asaj që mund të ndodhë në Euro 2012.

Gjermania shkon në këtë turne si një prej favoritëve, por një humbje 5-3 përballë Zvicrës një javë më parë dhe një fitore pa shkëlqim 2-0 ndaj Izraelit kanë bërë që të shuhet disi entuziazmi para se skuadra të udhëtojë drejt Polonisë për pjesëmarrjen në këtë aktivitet.

Gjermania u mund edhe nga Franca në një prej miqësoreve të këtij viti dhe drejtuesit e ekipit kanë bërë të qartë se objektivi kryesor për momentin është të kalohet faza e grupeve, ku ka kundërshtarë shumë të fortë si Portugalia, Holanda dhe Danimarka. Nëse nuk arrihet ky objektiv, trajneri Joakim Lëv nuk do të cilësohet përgjegjës, sipas asaj që konfirmoi vetë drejtori teknik i përfaqësueses gjermane, Matias Samer.

“Sigurisht që paraqitja jonë nuk do të jetë aq katastrofike sa të na detyrojë të shohim me një sy tjetër punën e shkëlqyer që ka bërë Lëv gjatë të gjithë këtyre viteve në kreun e kombëtares. Por nëse një gjë e tillë ndodh, do të thotë se ne do të kalojmë një periudhë të vështirë me të njëjtin trajner të kombëtares”, deklaroi Samer.

Lëv ka qenë në drejtimin e përfaqësueses gjermane që nga momenti kur Klinsman dha dorëheqjen pas përfundimit të Botërorit 2006. Ai drejtoi skuadrën në finalen e Euro 2008 dhe arriti ta ngjitë në vendin e tretë në Botërorin 2010, duke bërë që kjo kombëtare të cilësohet si favorite për suksesin në Euro 2012, ku ka përfaqësuesen me moshën mesatare më të re të turneut. (LajmeShqip.com)