Didier Drogba po merr në konsideratë seriozisht idenë e transferimi te Real Madrid, për t’u bashkuar me Zhoze Murinjon. Futbollisti 34 vjeçar kërkohet me ngulm nga kampionët e Spanjës dhe bisedimet kanë filluar mes përfaqësuesve të të dy palëve rreth një kontrate dyvjeçare.

Heroi i Ligës së Kampioneve të Çelsit u ble nga londinezët në vitin 2004 pikërisht nga Murinjo dhe ishte portugezi që e kërkoi me ngulm edhe një vit më parë, por bisedimet dështuan për shkak të shifrës që kërkonte klubi anglez për të lënë të lirë futbollistin nga Bregu i Fildishtë.

Tani që Murinjo ka plotësisht liri të zgjedhë se çfarë do të bëjë me merkaton e madrilenëve dhe Drogba është një futbollist i lirë, bisedat kanë rifilluar. Lojtari ka tërhequr interesimin e klubeve më të njohura të Evropës nga Spanja, Italia, Gjermania e Rusia, ndërsa ka ofertën më të mirë financiare nga Shangai Shenhua në Kinë. Mendohej se ai do të pranonte këtë ofertë të fundit, por disa probleme të kohëve të fundit brenda klubit kinez dhe fakti që ish-trajneri i Argjentinës, Serxho Batista, ka zëvendësuar mikun e tij Anelka si trajner, ka bërë që Drogba për momentin të lërë në pritje klubin kinez.

Murinjo dëshiron të fitojë Ligën e Kampioneve me Realin dhe perspektiva e një tjetër aventure të rëndësishme evropiane e tërheq lojtarin, ndonëse te madrilenët ai do të kishte një rol dytësor dhe në dy vitet e ardhshme do të kthehej në një lojtar stoli për të zëvendësuar Benzema apo Higuain. (LajmeShqip.com)