Ndeshja problematike mes Fortuna Dyseldorf dhe Herta Berlin që përcaktoi ngjitjen e Dyseldorf në Bundesligë, është kthyer në një skandal me përmasa të jashtëzakonshme.

Sikur të mos mungonin problemet e shfaqura në ditën e ndeshjes, në fushë dhe në dhomat e zhveshjeve, polemikat janë shtuar dje kur gjyqtari i Disiplinës në Federatën Gjermane të Futbollit, Hans Lorenz, ka vendosur të shtyjë vendimin rreth kësaj çështje. Shkaku ka qene shumë banal dhe ka ngjallur acarimin e dy skuadrave të përfshira dhe tifozëve: Lorenz rrezikonte të humbte avionin e prenotuar për Mynih ku do të jetë pjesë e delegacionit të Federatës në finalen e Ligës së Kampioneve.

Takimi mes palëve ka filluar dje në orën 13.35 në zyrat e Federatës Gjermane në Frankfurt, ndërsa janë dëgjuar të dy skuadrat, zyrtarët e ndeshjes dhe personat e sigurisë në stadium. Rreth orës 19.52, Lorenz dha vendimin: “Vendimi shtyhet për një datë të pacaktuar, nuk mund të japim një zgjidhje brenda 30 minutave për një çështje kaq komplekse”, ishin fjalët e tij.

Por vetëm 10 minuta më vonë ai është larguar rrufeshëm nga zyrat e Federatës Gjermane, pasi avioni i fundit për Mynih nisej në orën 21:30 dhe të gjitha fluturimet e tjera ishin të zëna.

Situata ka skandalizuar të gjithë, sidomos duke parë se vetë Federata Gjermane kishte premtuar se të premten do të kishte një vendim përfundimtar rreth kësaj çështje. Në këtë mbledhje u debatua dhe do të vendosej nëse do të mbetej në fuqi rezultati 2-2 i sfidës apo nëse do të riluhej ndeshja në të cilën tifozët vendas pushtuan fushën e lojës, ndërsa disa futbollistë të Hertës goditën gjyqtarin Shtark. (LajmeShqip.com)