Përfundon në shtëpi seria pozitive e fitoreve për Nju Jork dhe Xheremi Lin. Organizatori i ri i kësaj skuadre, i kthyer në hero dy javët e fundit falë kontributit të tij në 7 ndeshje radhazi që sollën po aq fitore, këtë radhë ka dështuar tërësisht përballë Nju Orlins, duke qenë protagonist në humbjen 89-85 pikërisht përballë publikut të tij. Disfata ka ardhur si pasojë e gabimeve të bëra nga organizatori i cili i ka falur 9 herë topin ekipit kundërshtar që e ka shfrytëzuar këtë mundësi për t’u shkëputur dhe për të udhëhequr që nga fillimi, deri në fund. 

LeBron Xhejms është treguar përsëri i pamëshirshëm ndaj ish-skuadrës së tij, Kliveland, duke udhëhequr Majemin në fitoren 111-87 në pallatin e sportit ku ai cilësohet “armik publik” dhe ku deri 2 vite më parë gjendej një poster gjigand i tiji. Xhejms e ka kthyer këtë ndeshje në një shfaqje personale duke shënuar 28 pikë, 5 topa në tabelë e 5 pasime, ndërsa qëndroi i ulur në stol gjatë të gjithë periodës së katërt. Ndërkohë, në Konferencën e Perëndimit, fitoret më të rëndësishme kanë qenë ata të Oklahoma përballë Golden Steit si dhe të Dallas përballë Filadelfia. (LajmeShqip.com)

Rezultatet

17.02.2012

Miluoki-Orlando           85-94

Sharlot-Toronto            98-91

Majemi-Kliveland         111-87

Sakramento-Detroit     108-114

Denver-Memfis            102-103

Minesota-Hjuston         111-98

G. Steit-Oklahoma       87-110

Dallas-Filadelfia            82-75

Nju Orlins-Nju Jork     89-85

Uashington-Utah          100-114

Feniks-LA Leikërs       99-111