Oklahoma ka hedhur një tjetër hap të gabuar në ndeshjen kundër Hjuston, duke u mundur me rezultatin 96-95 dhe duke humbur njëkohësisht edhe rekordin më të mirë të sezonit në NBA, që tani i përket Çikagos. Kevin Durant (33 pikë, 8 topa në tabelë) dhe Rasëll Uestbruk (26 pikë, 8 topa në tabelë, 4 pasime) kanë qenë në formën e tyre të zakonshme, por askush nuk e priste kundërpërgjigjen e Kevin Martin i cili shënoi 32 pikë për t’i dhuruar suksesin në sekondat e fundit skuadrës së tij. Pas kësaj humbje, Oklahoma ndjen më afër ndjekësit në Konferencën e Perëndimit, pasi San Antonio ka fituar takimin e 9-të radhazi në këtë sezon dhe bashkë me LA Klipërs janë vetëm 2 ndeshje pas tyre. 

Ndërkohë, Nju Jorku vazhdon të festojë paraqitjet e Xheremi Lin, që i ka dhënë kësaj skuadre entuziazëm si dhe fitoren e 7-të radhazi. Suksesi 100-85 ndaj Sakramentos ka qenë më i thjeshtë se sa pritej, ndërsa fenomeni i ri i NBA ka treguar aftësitë e tij si organizator, duke shënuar vetëm 10 pikë, por duke dhënë 13 pasime, për të vendosur një tjetër rekord në karrierën e tij të shkurtër si titullar në radhët e kësaj skuadre. Historia e jashtëzakonshme e paraqitjeve të tij e kanë kthyer Xheremi Lin në një fenomen botëror duke ndihmuar jo vetëm rritjen e shikueshmërisë sa herë që luan Nju Jork, por duke ndihmuar edhe në rritjen e popullaritetit të NBA, sidomos në Azi, një treg që nuk kishte shumë kërkesë që pas lamtumirës nga ky sport të Jao Ming. (LajmeShqip.com)

Rezultatet

15.12.2012

San Antonio-Toronto    113-106

Filadelfia-Orlando         87-103

Memfis-Nju Xhersi       105-100

Detroit-Boston             98-88

Sakramento-Nju Jork   85-100

Indiana-Kliveland         87-98

Sharlot-Minesota          90-102

Oklahoma-Hjuston       95-96

Nju Orlins-Miluoki       92-89

Denver-Dallas              84-102

Atlanta-Feniks              101-99

Portland-G. Steit          93-91

Uashington-Klipërs       84-102