Mesfushori i Milanit, Kevin Prins Boateng, nuk ka kursyer kritikat kundër Fabio Kapelos pasi trajneri i Anglisë kishte akuzuar hapur Gjermaninë se po vjedh talentet nëpër botë.

“Sot, skuadrat e mëdha kanë vëzhgues në të gjithë botën dhe “vjedhin” lojtarët e rinj duke i bërë oferta të parezistueshme federatave ku ata bëjnë pjesë, pa menduar për pasojat që mund të kenë këto vende të vogla. Gjermania ka në gjirin e saj 5 lojtarë me origjinë turke të cilët kanë veshur fanellën e kësaj kombëtareje për arsyen që shpjegova më lart”, ishte komenti i Kapelos.

Të parët që kanë reaguar ishin gazetat gjermane me tituj si “Kapelo fyen futbollin tonë”, e më pas Matias Samer: “Ne i hapim dyert lojtarëve me rrënjë emigracioni të cilët janë të mirëpritur. Ne nuk marrim asnjë kundër vullnetit të tyre”.

Por reagimi më i fort ka ardhur nga Kevin Prins Boateng, i lindur në Gjermani por që ka zgjedhur të luajë për Ganën. “Trajner i Anglisë ka bërë një gafë të jashtëzakonshme. Ndoshta e ka se nuk ka fjetur mirë gjatë natës!. Ozil dhe Tashçi janë me origjinë turke, por kanë lindur në Gjermani, kanë jetuar aty që fëmijë, ata flasin gjermanisht, mendojnë gjermanisht e luajnë me zemër për kombëtaren gjermane.

Sot bota ka ndryshuar, është bërë multietnike. Ozil, Tashçi dhe vëllai im Zherom mund t’i japin më tepër ngjyrë lojës së Gjermanisë. Unë kam filluar karrierën te ekipet e moshave të Gjermanisë po më pas zgjodha Ganën. Jam 50% gjerman dhe 50% ganez. Kam lindur në Berlin por brenda meje jam 100% ganez”, deklaroi Boateng. (LajmeShqip.com)