Sunday, 26 February 2012 17:55 
Ndeshjet e të dielës në kampionatin anglez kanë vërtetuar edhe një herë se Pol Skols dhe Rajan Gigs janë “të pavdekshëm” dhe me formën që po kalojnë, fare mirë mund ta shtyjnë “pensionin” pas moshës 40 vjeçare.
Dy “veteranët” e Mançester Junajtid i kanë dhuruar fitoren ekipit të tyre në fushën e Noruiç, duke i dhënë mundësinë “djajve të kuq” të vazhdojnë të jenë në garë për titullin kampion.
Skols ka kaluar në avantazh skuadrën e tij që në minutën e 7-të të takimit me një gjuajtje me kokë. Por më pas, ishte ekipi vendas që ka detyruar portierin De Gea të bëjë disa pritje spektakolare për të shpëtuar portën e tij. Megjithatë, gardiani i Mançester Junajtid është dorëzuar 7 minuta para përfundimit të sfidës, kur Holt arriti të dërgonte topin pas krahëve të tij.
Për të mbajtur në distancë prej 2 pikësh kryesuesit e Mançester Sitit, ka menduar Rajan Gigs, i cili ka shënuar pas një aksioni të gjatë pranë zonës kundërshtare dhe ka siguruar fitoren 2-1 të Mançester Junajtid.
Një ndeshje edhe më entuziazmuese ka qenë ajo mes Arsenalit dhe Totenhemit, në derbin më të famshëm të Londrës. Miqtë kanë kaluar në avantazh të dy golave me anë të Saha e Adebajor, ndërsa tifozët e “topçinjve” filluan të protestonin për paraqitjen e skuadrës së tyre.
Reagimi i Arsenalit është mbresëlënës, pasi Sanja e Van Persi rivendosin barazimin para pushimit të ndeshjes me golat e tyre. Sfida bëhet më interesante dhe në fillimin e pjesës së dytë, Arsenali gjen golin e avantazhit me anë të Rosiçkit. Për të vulosur fitoren, vjen një dygolësh i Teo Uollkot që e çon rezultatin përfundimtar në 5-2 për Arsenalin, një arritje e jashtëzakonshme që i mban në garën për pjesëmarrjen në Ligën e Kampioneve në sezonin e ardhshëm. (LajmeShqip.com)
Rezultatet
Arsenal-Totenhem 5-2
Noruiç-M. Junajtid 1-2
Stouk-Suonsi 2-0
Renditja
Mançester Siti 63, Mançester Junajtid 61, Totenhem 53, Arsenal 46, Çelsi 46, Njukasëll 43, Liverpul 39, Noruiç 35, Sandërlend 33, Everton 33, Fullhem 33, Stouk 33, Uest Bromuiç 32, Suonsi 30, Aston Vila 29, Ulvërhempton 22, QPR 21, Bllekbërn 21, Bolton 20, Uigan 20.
