Uashington – Shtëpia e Bardhë tha se presidenti i rizgjedhur rus Vladimir Putin ka hequr dorë nga një vizitë e planifikuar gjatë këtij muaji në Shtetet e Bashkuara, për një samit ekonomik dhe për bisedime me presidentin Barack Obama.

Shtëpia e Bardhë tha se Putin i bëri të ditur përmes një telefonate Presidenti i Rusisë, Vladimir Putin ka njoftuar homologun amerikan Barack Obama se nuk do të marrë pjesë në samitin e G8-ës që do të zhvillohet në Shtetet e Bashkuara më vonë gjatë muajit.

Zoti Putin, i cili bëri betimin si president pas katër vitesh të kaluara si kryeministër, njoftoi autoritetet amerikane se është i zënë me formimin e kabinetit.

Ai do të zëvendësohet në këtë samit nga presidenti i larguar Dmitry Medvedev, që e zëvendësoi Putinin në postin e kryeministrit.

Dy presidentët, ai amerikan dhe ai rus, do të mund të takohen në samitin e mëvonshëm të G20-ës, që do të zhvillohet në qershor në Meksikë. Në një deklaratë për media të Shtëpisë së Bardhë thuhet se, presidenti Putin i shprehu keqardhjen e tij presidentit Obama përmes një bisede telefonike.
Më herët gjatë javës, Uashingtoni zyrtar kritikoi reagimin e policisë ruse ndaj protestave anti-Putin në Moskë. Një zëdhënës i Departamentit të Shtetit deklaroi se Shtetet e Bashkuara ishin të shqetësuara nga keqtrajtimi i protestuesve paqësorë.
Organizatorët deklaruan se 20 mijë persona morën pjesë në një protestë ditën e diel kundër inaugurimit të Putin, edhe pse policia tha se ishin vetëm 8 mijë.