Tripoli – Lideri libian, Moamer Gadafi është i gatshëm ta braktisë pushtetin me kusht që ai edhe familja e tij të fitojnë imunitet nga ndjekja penale, shkruan gazeta arabe “Ashark al Avsat”, duke iu referuar një burimi të afërt me Gadafin.

Gazeta thekson se djali i Gadafit, Saif al-Islam ndodhet në krye të grupit punues të përfaqësuesve zyrtarë të Qeverisë libiane, të cilët po përpiqen të gjejnë zgjidhje për krizën libiane, e cila do të paraqesë largim të dinjitetshëm të babait të tij nga pushteti.

Edhe pse në opinion Gadafi dhe bashkëpunëtorët e tij e përjashtojnë idenë për dorëheqje, ekzistojnë kanale jozyrtare të komunikimit, përmes të cilave bisedohet për këtë, thekson gazeta, duke sqaruar se në vetë familjen e liderit libian dhe midis bashkëpunëtorëve të tij më të afërt, nuk ekziston pëlqim rreth asaj nëse ai duhet të vazhdojë të luftojë ose ka ardhur koha të tërhiqet.